Siman pasa 21 juni te cu 26 Juni despues di mas cu 20 aña a tuma luga un torneo di internacional di Basketball na Aruba cu a carga e nomber “Aruba Hoops on Fire”. Varios pais invita manera Curaçao a bin cu 5 team total Excel Basketball, Huskies Basketball, Sharks Basketball y tambe 1 team di Colombia Vaqueros Basketball nan tur a participa midiendo forsa contra otro pa mira cua lo bay cu e maximo premio.
Aruba Basketball Bond conhuntamente cu The Sports Unlimited Foundation (Stealers Basketball) a traha hunto pa trece un torneo internacional di caliber pa duna e teamnan local di Aruba un experencia con un torneo ta di Basketball.
Un participacion di 100% di teamnan local a yuda engrandece e torneo. Teamnan manera Sportverening Aruba Juniors, Club Estrella, Impact Basketball, Dream y Stealers basketball hunto cu e teamnan internacional a participa den 3 categoria, 13U, 16U y 19U. Un gran fanaticada di Curaçao a acompaña e 5 teamnan, nan a trece un ambiente fenomenal den 2 facilidadnan na Aruba cu ta YMCA San Nicolas y Aruba Juniors na Oranjestad.
Un total di mas cu 40 wega mester a tuma luga den 4 dia pa saca e maximo ganadonan. Mester bisa cu tur 2 facilidadnan por a gosa den un bon asistencia di parti di fanaticada di cada team tanto local como internacional. Den e diferente categorianan tabata tin un mescla di teamnan local y internacional. Den e categoria di 13U tabata tin 7 team consistiendo di 2 pool uno cu 4 team anto e otro cu 3. Sharks, Huskies, Impact, Aruba Juniors cu 2 team y Stealers basketball a bataya pa wak kendenan lo ta e top 4 teamnan pa bay play-off. Finalmente ta Huskies, Aruba Juniors, Dream Y stealers a bay play-off. Prome luga a keda Stealers Basketball, di dos lugar a keda Dream Basketball y na di 3 lugar a keda Aruba Juniors.
Den e categoria di 16U tabata tin mas ekipo, un total di 8 ekipo cu a wordo parti den 2 pool. Den e categoria aki tabata tin Sharks basketball un team cu atletanan experiencia internacional a bin bon prepara, Excel Basketball un ekipo cu pa prome biaha ta participa den un torneo pafo di Curaçao tambe a mustra un Basketball di bon nivel. E team di Colombia Vaqueros un ekipo completo cu un tremendo full court pressure defense a duna tur team dolor di cabes. Pa cera e division aki 5 team di Aruba a bataya pa wak kende lo bay play-off. Finalmente 4 team a bay playoffs cu Vaqueros Basketball canando na prome luga hungando un tremendo basketball, sigui pa Stealers Basketball na segundo luga y finalmente Sharks Basketball di Curaçao na tercer luga.
Den e categoria di 19U tabata tin menos ekipo pero asina mes tur ekipo a duna e maximo esfuerso pa tuma e prome luga. E teamnan participante den e categoria aki tabata Excel Basketball di Curaçao y 3 team di Aruba cu ta Aruba Juniors, Club Estrella y Stealers Basketball. Mester bisa tambe cu den a categoria tabata tin tremendo show di dunknan di parti di diferente atleta manera Luis Cabrera di Stealers, Simeone di Aruba Juniors y di Curaçao Ivan Martijn. Publica a gosa di e hugadanan aki.
E resultado di den categoria tabata na prome luga Stealers Basketball, na di dos luga Club Estrella y na tercer luga Aruba Juniors. Durante e torneo di Aruba Hoops on Fire tambe a tuma luga despues di basta aña tabata tin un wega di exhibicion consistiendo mucha muhenan so. Aki tambe a participa 2 tremendo atletanan di pafo di Aruba. 1 atleta femenino di nos hermana isla Curaçao y tambe 1 atleta femenino di Colombia. Esaki tabata un tremendo gesto di e organisacion pa habri e luga pa e dos atletanan aki participa den e torneo.
E atletanan local a haya un experiencia inolvidabel pasobra despues di basta aña nan tabata parti di un inicio atrobe di Basketball pa e ser femenino. Mester bisa cu e Aruba Basketball Bond y Stealers basketball por ta satisfecho con e torneo a transcuri e 4 dia. Tur atleta a gana experiencia durante e torneo aki. Ta di spera cu otro aña 2024 e torneo aki sigui.
Pa mas informacion por tuma contacto cu Geraldo F. Milton na 7443074
