Si nos wak e historia di e Ley di Centro di Cuido di Mucha, nos por bisa cu ta for di 1998, e prome concepto a pasa Parlamento unanimamente y na juni 2017, esaki a bolbe sosode. Pero ehecucion di e ley mes, ainda no ta posibel, debi na algun aspecto organisatorio, cu ta sumamente importante y compleho p’e ley drenta na vigor. Den e Tratado di Derecho di Mucha, articulo 18 Bon Educacion ta indica: E mayornan mester ta responsabel pa duna nan yiu un bon educacion. Si dado caso nan mester di yudansa den esaki, e mayornan mester por haya yudansa di nan Gobierno, cu tin hende den servicio cu sa mas riba e topico aki. Nan por duna sugerencia riba con ta e miho manera pa cuida un yiu of con por educa e yiu miho. Gobierno tambe mester percura cu tin e centronan di cuido pre-escolar disponibel pa e mayornan cu ta traha.

CANTIDAD A BAHA
Den comparacion cu Censo 2010, na 2020 a observa un bahada den e porcentahe di mucha entre 0 pa 3 aña, cu tabata bishita un centro di cuido (crèche) of speelschool. Mientras cu na aña 2010, 45.4% di e muchanan te cu 3 aña tabata bayendo un centro di cuido (crèche) of speelschool, na 2020, e porcentahe aki tabata 35.9%. Awendia tin hopi dato y investigacion haci tocante kico ta e nucleo y importancia di un Centro di Cuido di Mucha y dicon e ta asina importante pa nos muchanan, specialmente esunnan di 3 aña bishita regularmente un Centro di Cuido di Mucha, prome cu nan inicia nan carera escolar na scol preparatorio.

PAKICO CENTRO DI CUIDO DI MUCHA?
Un centro di cuido di mucha ta brinda hopi beneficio tanto p’e mucha como e mayornan. E centro di cuido ta percura pa enrikecemento; un centro di cuido riba nivel ta un enrikecemento enorme pa e muchanan. Na e centro di cuido di mucha e muchanan ta gana otro experiencia cu na cas. Nan ta siña anda cu otro mucha, siña comparti y hunga y descubri nan rol dentro di e grupo. Esaki ta tremendo pa nan desaroyo social. Tambe riba e areanan motorico, creativo y cognitivo e muchanan ta desaroya nan habilidad- y talentonan a traves di wega. Sin lubida cu e mucha ta haya oportunidad di desaroya su mes den forma independiente. Dentro di un ambiente sigur y confiabel e muchanan ta crea confiansa propio y ta durf di explora.
Fiabilidad tambe ta di sumo importancia; cu un centro riba nivel como mayor semper bo ta sigura di e cuido diario. Diariamente e trahadornan pedagogico ta traha entusiasma y cariñosamente cu bo yiu. Nan ta yudando abo como mayor, lanta y educa bo yiu segun e norma- y balornan cu abo tambe tin. Y sigur ta aporta na un bon preparacion pa nan comienso di scol preparatorio. Un mayor mester sinti e confiansa y siguransa cu su yiu ta keda den bon man, unda nan lo duna atencion adecuado y di nivel na cada mucha.

CUIDO DI FAMIA PORNADA VS CUIDO CU PAGO
Un di e retonan cu e centronan di cuido di mucha ta encontra ta e suma mensual cu e mayornan mester paga. Varios centro a indica cu no tin un sanccion ni consecuencia legal p’e mayornan cu ta dicidi pa no cumpli cu nan pago. Esaki ta trece un presion enorme riba e aspecto financiero di e centronan, mirando cu nan si tin cu sigui cumpli cu nan gastonan mensual. Den varios ocasion e centronan a indica cu nan ta purba di coopera mas cu ta posibel y keda duna servicio sea na un prijs mas barata of sin pago. Famia semper ta keda un bon opcion, pero no por kita afo, cu hasta pa e famia (wela, welo, tanta, prima, etc) ta un responsabilidad enorme y e educacion ta di sumo importancia. P’esey ta bon pa haci palabracion concreto tocante e lantamento y educacion cu abo como mayor ta desea pa e famia cu ta yuda bo den esaki cumpli cu ne, ya cu ta trata di guia den e mucha su desaroyo den e añanan di mas crucial di su bida. Con bon intencion e famia por tin, cuido di mucha tin un otro meta, ora cu e trahadornan pedagogico educa ta ehecuta un bon plan pedagogico structural, unda ta stimula bo yiu den su desaroyo optimal.

CENTRO DI CUIDO TA LEUK PA TUR!
E muchanan ta disfruta tur dia di e actividadnan desafiante, paden y pafo, nan su y/of cu nan compañeronan di centro. Masha lihe e muchanan ta considera e centro di cuido como nan di dos cas. Si e centro di cuido di mucha ta uno sumamente active, e muchanan ta ansioso pa celebra e dianan festivo of haci e proyectonan peculiar, pa nan descubri nan potencial. Definitivamente e centro di cuido di mucha ta un fiesta, unda e muchanan ta desaroya den forma di wega y ta haya oportunidad di crece y descubri nan mes y tur loke ta den nan interes.

LEAVE A REPLY

Please enter your comment!
Please enter your name here