ORANJESTAD, Aruba –27 januari 2022: Desde 1 di februari 2022 reglanan nobo cu ta regarda duracion di validez di e certificado di vacunacion Europeo (Digital Corona Certificate of ‘DCC”) lo drenta na vigor. E motibo pakico ta introduci cambio den duracion di validez di e certificado DCC ta relaciona cu reduccion den efectividad di e vacuna cu tempo. Esaki significa cu desde luna di februari di aña 2022 e validez di e certificado di vacunacion Europeo ta caduca 9 luna despues cu e persona ricibi su ultimo vacuna di e serie basico. Cu serie basico ta referi na e prome y di dos dosis di e vacuna di Pfizer of na e 1 dosis di e vacuna Johnson & Johnson.
Pa esnan cu a ricibi e prome y di dos dosis cu e vacuna di Pfizer of 1 solo biaha e vacuna di Johnson & Johnson (Janssen) y no a haña e booster shot ainda, lo haña nan mes confronta cu varios pais Europeo lo no acepta e certificado di vacunacion di e serie basico mas. E validez di e certificado di vacunacion DCC por afecta no solamente e posibilidad pa drenta un pais, pero tambe pa haci uso di diferente servicionan manera entre otro den horeca y eventonan cultural. Pa esnan cu a haña e booster, e validez di e certificado di vacunacion DCC lo wordo extende cu 9 luna despues di e booster-shot.
DVG ta sigui recomenda tur persona di 18 aña bay ariba pa tuma e booster shot mas pronto posibel, cu ta 3 luna despues di e di dos vacuna di Prifzer of 3 luna despues di e vacuna di Johnson & Johnson. E booster shot ta precura pa e persona tin un mihor proteccion contra e variante di Omikron y ta preveni hospitalisacion door di percura pa tin un cantidad grandi di anticurpa como resultado di un boostershot recien. Persona cu a hanja un infeccion di COVID19 recien, mester warda 3 luna despues di a test positivo pa tuma e booster shot.
DVG ta recomenda tur biaheronan pa prome cu nan biaha tuma bon nota di e reglanan cu ta regarda vacunacion y testing di e pais di destinacion. Cada pais ta decidi su mesun reglanan pa cual motibo reglanan pa drenta cada pais por ta diferente. Esnan 18+ cu ta desea e booster shot por walk-in na e prikpost di DVG situa na Centro Libertador Betico Croes of na e unidad mobile dependiendo di su ubicacion.
Pa mas informacion di orarionan di vacunacion y e diferente ubicacion di e unidad mobile di vacunacion por tuma nota di informacion riba www.arubacovid19.org, riba facebook-page di DVG cu ta Directie Volksgezondheid DVG Aruba of por yama e COVID19-helpdesk via 2800101 durante orarionan di oficina.
