Comision Celebracion Dianan Nacional (CCDN) ta felicita Comision Promove Cultura, Fundacion Cultural di Festival Folklorico, Departamento di Cultura y tur esnan envolvi pa organisa un tremendo Festival Un Canto pa Aruba su Himno y Bandera 2026. A cuminsa diabierna 6 di maart 2026 cu e categorianan infantil y hubenil caminda nos mucha y hobennan a demostra un nivel halto cu cancionnan cu ta sali for di nan curason y hopi bon presenta. Esnan presente por a mira con e publico tabata biba cu cada cancion y artista cu a mustra nan amor pa nan Himno y Bandera den gran forma. Hopi ta esnan cu a bin apoya nos mucha y hobennan cu bandera, uniform y pancartanan pa motiva nan participante faborito. Riba diasabra a toca e categoria di adultonan cu tambe a sa di deleita e publico manera tur aña cu composicion y presentacionnan patriotico. Un Pabien na tur cu a participa mirando cu pa subi un escenario y presenta no ta facil. E ta exigi hopi esfuerso, preparacion y tempo. Un pabien special na tur cu a sali ganado of ganadora den tur categoria.
Diadomingo a culmina den un bunita Explosion Cultural acompaña pa un programa di canto, baile, arte y presentacion di tur esnan cu a sali ganado den categoria infantil, hubenil y adulto.
CCDN ta extende un invitacion na comunidad henter pa asisti na e grandioso Feria Patriotico cuminsando riba 11 di Maart 2026 te cu dia 13 di Maart 2026. Durante e Feria Patriotico aki por disfruta di diferente tentnan conoci pa nan cuminda y pasabocanan crioyo, artesania y articulonan pa celebra nos dia di Himno y Bandera. Lo tin hisamento di bandera pa Scouting Aruba. Monarcanan di Aruba su Carnaval 72 lo ta presente como tambe Dazzling Dancers Aruba – NTG cu NLG Dancers, Dansa Aruba, lo di declamacion di poema como tambe entretenimento musical di Rejoice, Shine Music, Sabor Crioyo y D’Nova
Instancianan cultural y social tambe ta forma parti di e feria cultural den forma di un EXPO caminda lo tin nan booth pa expone nan producto y/of servicio y duna informacion na publico general. Mirando cu nos ta celebrando 50 aña di nos Himno y Bandera y 40 aña di Status Aparte, Gobierno di Aruba a opta pa celebra esaki grandemente e biaha aki cu mas dia, pa asina comunidad henter por difruta den un ambiente di celebracion. Entrada pa e Feria Patriotico ta completamente gratis. Esaki lo tuma luga riba e fechanan menciona na Aruba’a Carnival Village na San Nicolas di 7:00 pm – 10:00 pm.
Pues e Feria Patriotico lo conta cu musica, baile, arte, poesia, canto y demas actividadnan cultural pa entretene tur presente cu un ambiente cultural y patriotico. Bin cu famia y celebra nos 50 aña di Himno y Bandera y 40 aña di Status Aparte grandemente den un ambiente familiar y cultural.
