ORANJESTAD – En conexion cu celebracion di e di 6 aniversario di e Metanan Mundial Pa Desaroyo Sostenibel di Nacionnan Uni, Comision SDG Aruba a lansa campaña di conscientisacion na IMAX Gloria. Na e ocacion, Minister di Finansa y Cultura Xiomara Maduro a reemplasa Prome Minister.
Prome Minister a participa pa medio di un video na unda cu e ta enfatisa cu pa Aruba e SDGs ta un prioridad y ta determina pa keda para tras di SDGs pa keda brinda prosperidad y paz y tambe pa logra un planeta sano. Awor mas cu nunca cu mundo henter tin tur su retonan cu experiencia di e pandemia.
‘Mescos cu mundo ta celebra e SDGs, Auba su respuesta na e retonan nos dilanti mester ta uno di union y na unda nos ta invita henter comunidad incluso nos sector comercial y nos NGOs pa hunto nos enfoca pa desaroya solucionnan innovativo y sostenibel pa Aruba,’ Premier Wever – Croes a expresa.
‘Ban demostra cu accionnan decisivo cu nos lo por progresa y nos lo por avansa y nos lo por crea un futuro resiliente pa un y tur riba nos isla. Pa realisa e metanan exitosamente y crea un miho bienestar, ta rekeri esfuerso di nos tur y mi ta invita boso tur pa duna boso aporte. Asina so, por logra e miho futuro pa nos tur. Aruba mester di nos tur,’ Prome Minister Evelyn Wever-Croes a conclui.
