Botica di Servicio ta orguyoso di anuncia cu e di 8 edicion di Diabetes Run & Walk 2025 ta oficialmente SOLD OUT.
Participante cu a haci nan online payment caba ta wordo suplica pa pasa busca nan shirts y BIB diabierna, 14 di november di 5pm pa 8pm na Botica Eagle.
Den colaboracion cu CMB N.V., Punta Brabo Diagnostics y Subway, Botica di Servicio ta organiza e di 8 edicion di Diabetes Run & Walk lo tuma lugar riba diadomingo, 16 di november 2025 cu e meta di recauda fondo y tambe trece consientisacion pa diabetes. E fondo lo bai na Jump18 pa e di tres aña ehecutivo pa asina nan por continua cu nan cohort unda nan ta enfoca riba un miho estilo di bida pa muchanan cu obesidad y na riesgo di diabetes. Dr. Busari, hunto cu su team, ta guia e esfuerzo aki pa medio di workshops y otro iniciativanan practico pa trece un cambio positivo y na largo plazo pa e muchanan y nan famia.
E evento aki ta educa personanan pa con maneha nan diabetes di miho forma y tambe pa asina motiva e comunidad na Aruba pa adapta na un estilo di bida mas saludabel. Diabetes ta sigui ta un problema serio riba nos pais, di cual e porcentahe di personan cu diabetes ta casi dobel e porcentahe di e populacion mundial.
Botica di Servicio kier a extende su gradicimento profundo pa cada persona pa nan apoyo y contribucion. Ta na expectativa di ricibi tur participante riba diadomingo, 16 di november pa un edicion mas impactante y inspirador di Diabetes Run & Walk.
