Recientemente, Instituto Pedagogico Arubano (IPA), a tene su ceremonia di graduacion di aña academico 2023-2024. Cu orguyo, IPA ta anuncia cu awor nos enseñansa ta conta cu un grupo di 22 maestro cu lo reenforsa nos educacion na Aruba. E graduadonan tin diferente specialisacion, entre otro, Bachelor Nederlands als Vreemde Taal, Movecion y Salud, Pedagogisch Didactisch Getuigschrift y Estudio pa maestro di Enseñansa Primario.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-7-1024x683.jpg)
E studiantenan cu a gradua den aña academico 2023-2024 ta: Bachelor Nederlands als Vreemde Taal: Gillianny Contreras, Janice Kock. Movecion y Salud: Lyan Cecilia, Christopher Croes, Robert Dijkhoff, Meloushka Dirksz, Myron Ras, Shawn Tromp. Cursus Pedagogisch Didactisch Getuigschrift: Diana Schotborg. Estudio pa maestro di Enseñansa Primario: Maryline Boekhoudt, Roxanne Haselhoef, Darlisa Alders, Merveline de Cuba, Gelaine Figaroa, Julaisa Tromp, Roycelynn Fingal, Darinella Geerman, Mariëlle Laclé, Maria Maldonado Pardo, Nashmine Noguera, Litsxya Ras, Charlaynne Santos Diaz.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-5-1024x636.jpg)
Ta importante pa menciona cu pa prome biaha IPA a otorga diploma di maestro di enseñansa primario cu e specialisacion di 4-12 aña banda di algun cu tin specialisacion 4-8 of 6-12 aña. Pues 2024 ta marca historia cu e cambio pa un specialisacion amplio haciendo e posibel pa e maestronan aki por traha den cualkier klas di enseñansa primario.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-4-1024x683.jpg)
Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. El a inicia su discurso bisando e graduadonan cu nan a logra di bira maestro di scol por medio di tremendo dedicacion y perseverancia.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-3-1024x683.jpg)
PEN2030 ta para pa, entre otro, responsabilidad comun pa un enseñansa di calidad, ‘empowerment’, respet, mentalidad habri y curiosidad pa siña. Drs. Richardson a splica cu e graduadonan tin e base aki den nan formacion como maestro, pero awo ta keda na cada un di nan pa keda nutri e balornan aki p’asina carga e vision di PEN2030.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-2-1024x683.jpg)
The influencer teacher tabata e tema di IPA su graduacion. E mensahe cu drs. Richardson a comparti cu e graduadonan ta cu maestro ta un profesion cu tin hopi influencia, un impacto profundo y duradero riba nos bida. Den un mundo domina pa social media stars y tur sorto di sensacion cu ta go viral, ta facil pa lubida e influencers original cu ta e maestronan! Segun drs. Richardson un maestro ta inspira curiosidad, fomenta creatividad, inculca amor pa siñamento pa bida largo cu ta bay mas leu cu e murayanan di klas, mas leu cu e bukinan cu e ta uza, pasobra e ta forma y moldia caracter, crea balor y perspectiva. Cada biaha cu un maestro encurasha un mucha of un hoben pa dream big, nan ta sigui influencia otro. Pues e maestro, ta causa e ripple effect aki!
![](https://solodipueblo.com/wp-content/uploads/2024/07/Graduation-IPA_The-Influencer-Teacher-1-1024x683.jpg)
Drs. Richardson a termina su discurso bisando e graduadonan: “Be the influence the world needs!”
E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den Las Palmas Ballroom di Holiday Inn Resort Aruba.
![](https://solodipueblo.com/wp-content/uploads/2024/07/Graduation-IPA_The-Influencer-Teacher-8-1024x666.jpg)
IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!