Na aña 1993 a tene e prome conferencia pa hobennan católico di Aruba, esta Youth Explosion. For di Miami a bin un ekipo pa asisti e ekipo di Aruba den e organización completo di esaki. Na cada encuentro, durante un weekend y pa 22 aña largo, hobennan di Aruba tambe a gosa y a experiencia con bon y dushi ta, pa ta un hoben cu ta kere den Dios. Lastimamente pa motibonan financiero y kisas menos interes di adultonan, e ekipo di Aruba a stop e Youth Explosion Aruba, pa re-defini e conferencia aki. Durante e añanan aki, e ekipo di Aruba y Ministerio di Musica di Aruba a biaha y hiba e Youth Explosion aki na rumannan isla Curacao, Bonaire, Hulanda y tambe pa Trinidad & Tobago.
Na aña 1998 pastoor Ian Taylor di Trinidad & Tobago a bishita e conferencia Youth Explosion aki na Aruba como orador principal y el a keda encanta cu esaki. El a regresa cada aña y tin biaha asta 2 bes pa aña. Fr. Ian taylor a contribui grandemente cu e conferencia aki na Aruba; e tabata haci Misa Carismatico, duna charla pa hoben, mayornan y lidernan di diferente grupo, e tabata resa cu e hobennan y mas cu tur cos el a haci nos Fe crese den e presencia real di Hesus den adoracion, cu exposicion di Santimo y asina hopi a experiencia Dios su poder atraves di poder di oración. Fr. Ian Taylor a tuma e curashi pa hiba e conferencia aki na su país, Trinidad y a dun’e otro nomber, esta e Jesus Explosion. Esaki tabata na aña 2003 y for di Aruba un grupo grandi di organisadornan di Youth Explosion a biaha hunto cu Ministerio di Musica di Alabansa y Adoracion (M.A.A.) pa asina yuda cu e introduccion di Jesus Explosion. Awendia, e conferencia Jesus Explosion Trinidad, ta uno internacional caminda gruponan Catolico di tur parti di region caribense y asta di USA y Europa ta biaha pa participa na e conferencia. Fr. Ian Taylor a haci Jesus Explosion su Mision pa hiba Cristo na diferente paisnan den region y ta sigui ta un conferencia pa hoben, hoben adulto y adulto cu kier sigui e fe Catolico, cu hopi siñansa y memorianan único den e bida spiritual. E aña aki un grupo di hoben y adulto lo biaha pa atende e di 24 conferencia di Jesus Explosion na Trinidad.
“Faith Travelers” ta un grupo di Mision y Peregrinacion di diferente parokia di Aruba, resorta bou guia spiritual di Pastoor Andres y Diacono Gibi. E intención di e biahe pa Trinidad tambe ta implica, cu cada hoben di Aruba, cu lo participa, lo por pasa door di e experiencia único aki na Trinidad y asina bin Aruba y traha riba preparación y formación pa cuminsa bek cu Youth Explosion Aruba.
E grupo di biahero actual ta consisti di mas tanto hoben y hoben-adulto cu ta studiante ainda. Tin hopi gasto envolví y ta cay pisa pa e hoben studiante. Pa yuda e grupo aki, e kerngroep a planea varios actividad pa recauda fondo pa cubri mayoria gasto pa e hobennan. E prome actividad lo ta un Concierto riba dia di Pasco di Resureccion, titula: “E ta bibo!”
Bayendo bek den tempo, por sinti nostalgia cu awendia no tin hopi actividad entorno e celebracionnan eucaristico- cu Iglesia Catolico Universal ta celebra. E gana tey pa bay un retiro, un anochi di alabansa, un seminario y otronan mas. E grupo “Faith Travelers” ta bay cu un mision y “Youth Ministry Aruba” sigur lo percura pa ehecuta cada actividad hubenil na Aruba, na su debido tempo.
Pueblo di Aruba ta keda invita pa asisti na e concierto riba e dia di Pasco di Resureccion, esta 5 di april próximo y lo tuma luga na Club Caiquetio- Paradera. Porta lo habri pa 7or di anochi. E concierto ta carga e nomber: E ta bibo! Lo tin diferente ministerio di musica di parokianan, cu lo participa na e concierto aki, manera: Amigonan di Hesus y Maria di Dakota, Ministerio
di Alabansa y Adoracion (MAA) hunto cu e hobennan di Hearts on Fire di Savaneta, God’s Sons bon conoci na Parokia di Sanicolaas y Brazil. For di Curacao e popular Koor Journey of Faith bou direccion di sra Melania van der Veen. Hunto lo anima pueblo cu musica di amor, goso y pas. Lo tin un bar (non-alcoholic) y cushina bon surti.
Ticket ta obtenibel na
Gallo Rojo San Nicolaas, Botica Sta. Cruz y FootFit Backstage Salon O’stad, na balor di Awg 20,- adulto. Tin ticket special pa mucha di 6 te 12 aña na balor di Awg 10,=.
Pueblo di Aruba bini hunto pa asina celebra Cristo Hesus Resusita. E Hesus bibo. Esun di ayera, mañan y semper. Bini y yena bo curason cu alimento spiritual y asina contribui tambe cu e hoben/ hoben-adulto misionero, nan biahe den luna di juli proximo. Bin y sinti e goso y paz cu Cristo so por duna nos. Aleluia!
Pa mas informacion por contact e ekipo organizador via e-mail:
faithtravelers.aruba@yahoo.com
“… nos no ta biba a base di loke nos ta mira, pero a base di loke nos ta kere.” – 2 Corintionan 5:7
