Diabierna mainta, corte di casacion na Hulanda lo emiti nan veredicto riba e caso inicia pa Fundacion Orguyo cu ta reclama matrimonio di mes sexo na Aruba.
Tabata algun luna pasa cu corte di beroep a duna un sentencia na nan fabor, pero Gobierno a bay den casacion riba varios aspecto, unda Gobierno ta haya cu Huez a bay sinta riba stoel di gobierno.
E decision di diabierna dia 10 di november por caya sea na fabor of contra. Si e cay na fabor di fundacion Orguyo, esey kemen cu matrimonio di mes sexo lo mester bira un hecho na Aruba. Si e cay den contra di fundacion Orguyo, esey kemen cu gobierno no mester implementa esaki. Sinemabargo tin un ley entrega na parlamento di Aruba dor di Miguel Mansur, Marisol y Raiz, cual ley lo mester wordo trata den lunanan nos dilanti. Aki e parlamentarionan lo mester vota y un mayoria lo dicidi si ta SI of NO.
Pues, e ley di matrimonio di mes sexo ta depende ainda di dos factor, cual uno ta sentencia di casacion diabierna awor y otro ta e votacion den parlamento di Aruba ora e ley wordo trata.
