Departamento di Impuesto ta recorda cu dia 2 di juni proximo ta e ultimo dia cu por entrega e declaracion definitivo di winstbelasting 2024 y haci e pago corespondiente.
Manera conoci, desde aña fiscal 2023 mester entrega e declaracion di winstbelasting den forma electronico via e portal “BO impuesto” (BOi). E formulario digital ta disponibel den BOi desde 7 di maart 2025. Awor e fecha final ta yegando y ta importante pa e contribuyentenan di winstbelasting cumpli na tempo.
Entrega e declaracion y haci pago
Si acaso no ta alcansa pa entrega e declaracion definitivo pa dia 2 di juni 2025, ta consehabel pa entrega e declaracion provisional (voorlopige aangifte) y haci e pago corespondiente no mas laat cu dia 2 di juni 2025. Inspector lo evalua e peticion y si e contribuyente cumpli cu e condicionnan pa extension, e ultimo dia pa entrega e declaracion definitivo y haci e pago corespondiente ta bira dia 2 di december 2025. Debi cu Inspector tin cu evalua e peticion pa extension di termino, ta recomendabel pa entrega e declaracion provisional di awor caba y no warda te dia 2 di juni. Si sosode cu Inspector no bay di acuerdo cu e peticion, e ora e contribuyente tin tempo ainda pa entrega e declaracion definitivo.
Account di BOi
Tur contribuyente di winstbelasting mester tin un account di BOi pa por log in den e portal y yena e formulario di declaracion. Ta importante pa remarca, cu cada contribuyente ta administrador principal di su account (belastingplichtige admin). E tin su propio nomber di usuario (username) y password. Si acaso e contribuyente tin un consehero fiscal (belastingadviseur), e por autorisa su consehero via BOi pa atende cu su winstbelasting.
Pa preveni uzo indesea di su datonan di impuesto, ta importante pa e contribuyente nunca duna un tercera (un persona of consehero) e datonan pa log in den su portal. Conseheronan tin nan mesun datonan pa log in den BOi.
Si no tin un account di BOi
E contribuyentenan di winstbelasting cu no tin un account di BOi mester haci un peticion mesora via impuesto.aw: Home > Digitale formulieren > BOi account. Si mientrastanto un compania a wordo registra como “opgeheven” na Camara di Comercio, mester meld esaki tambe na Departamento di Impuesto. E companianan cu no tin actividad comercial pero ta registra na Camara di Comercio, tin e obligacion di entrega e declaracion di winstbelasting. Pa cu esaki e compania mester tin su account di BOi pa e por drenta den e portal. Keda sin cumpli lo bay causa un boet locual no ta necesario.
Incumplimento
Contribuyentenan cu no cumpli cu entregamento di e declaracion definitivo, lo haya un cobransa adicional esta un ‘naheffingsaanslag’ inclui boet. Mescos ta conta si acaso e cliente a paga un suma menos cu locual el a declara na winstbelasting. E boet pa incumplimento di entregamento di e declaracion ta maximo Afl. 2.500. Si e contribuyente no haci e pago di winstbelasting of no haci e pago corectamente, e boet ta maximo Afl. 10.000.
Departamento di Impuesto ta conseha tur contribuyente di winstbelasting y/of nan conseheronan fiscal pa no warda te na ultimo pa entrega e declaracion y haci e pago di winstbelasting corespondiente pa evita un cobransa adicional (naheffingsaanslag) y e boet pa incumplimento.
