Companianan di step bike na Hotelnan a cuminsa caso contra Gobierno
ORANJESTAD – Awe mainta a tuma lugar den Corte di Husticia, caso sumario cu companianan di step E-Bike y Green Bike den e sector hotelero, a cuminsa contra Gobierno.
SOLO DI PUEBLO por a compronde cu e companianan ta cuestiona e decision di Gobierno cu ta perhudica nan. Di parti di Gobierno ta mustra cu e stepnan ta forma un peliger den trafico y cu ta usando tereno di Gobierno sin cu ta paga pa esaki.
CASO SUMARIO
E caso sumario ta relaciona cu e decision di Minister di Husticia pa kita tur e stepnan for di caminda ya cu esakinan ta forma un peliger pa trafico y esnan cu ta riba e step.
Un abogado di Bonaire, a representa e dos companianan mientras cu Gobierno a wordo representa pa hurista di Gobierno.
GOBIERNO A TUMA ACCION SIN NOTIFICA
Ta asina cu promer cu tratamento di e caso, Hues a haci un serie di pregunta den direccion di Gobierno. Hues a puntra, pakico a tuma e decision aki. Di parti di Gobierno a wordo mustra cu e stepnan ta wordo poni riba caminda siendo cu nan no tin ningun permiso pa esaki. Pesey Gobierno a dicidi cu ta kita nan for di caminda publico.
Hues a puntra si Gobierno a notifica e companianan pa medio di un carta, un mail cu ta bay tuma medida contra e stepnan. E hurista di Gobierno a bisa Hues cu diferente biaha a haci anuncio publico di e medida pero no a manda notificacion na e companianan.
E hurista di Gobierno a bisa Hues cu door cu e companianan aki no ta paga belasting di number y esey ta haci cu Gobierno no sa kendenan ta doño. El a mustra cu e companianan tabata hiba maneho via one line, caminda clientenan tabata paga one line y coy un di e stepnan cu ta staciona un caminda riba caya y ora caba di us’e ta lag’e staciona un caminda riba caya.
TABATIN PERMISO PERO A WORDO HALA ADEN
E abogado di e companianan a bisa Hues cu nan tabatin permiso y na dado momento esaki a wordo hala aden. Nan a bolbe pidi permiso pero no ta hayando contesta di Gobierno. Segun e abogado, nan ta operando for di 2017 y 2019 y na dado momento e permiso a wordo hala aden. For di 2022 nan no ta hayando contesta di Gobierno. Door di esaki, tin un debe entre 24 y 25 mil florin. E abogado a remarca cu nan no a haya ningun notificacion di Gobierno tocante e medida.
HOPI AÑA TA OPERANDO
El a splica cu e negoshi di step ta un forma di vehiculo mas sostenibel cu ta laga e turistanan move mas liher ariba e strip di e hotelnan. Segun e abogado door cu taxi ta sali caro y no ta tur ora tin taxi disponible, e step ta un forma cu e turistanan ta move mas liher. Un di e companianan ta existi desde 2017 y e otro desde 2019.
DECISION TA PERHUDICA COMPANIANAN
E abogado di e companianan a cuestiona e hecho cu un dia pa otro, Gobierno ta tuma un decision asina drastico. E companianan ta haya masha straño cu Gobierno ta bisa cu e no sa nada di e companianan. E abogado a cuestiona e hecho cu nunca antes Gobierno a tuma un accion contra nan y cu e decision aki ta perhudica e companianan. Esaki ta trece cune cu e companianan ta haya nan mes den problema financiero grandi, siendo cu tin un necesidad grandi pa e tipo di vehiculo aki den sector hotelero. A wordo mustra cu entre e dos companianan, nan tin 13 empleado y nan no sa a base di kico Gobierno a actua cu ta un situacion diferente compara cu e ultimo añanan. Na opinion di abogado, e tipo di step aki, no ta wordo menciona den ley. E companianan ta haya cu Gobierno no a pone interes di tur partido hunto pa yega na un bon decision. Nan ta haya cu e seguridad di trafico no ta e motibo pa tuma un decision asina drastico. E abogado a pidi Hues pa declara e decision di Gobierno no admisibel.
STEPNAN TA FORMA PELIGER PA TRAFICO
E hurista di Gobierno a reacciona cu e tipo di vechiculo aki ta causa hopi accidente. Nan no ta aparece den ley y ta causa hopi daño y hasta morto. E hurista a mustra Hues potret con turistanan ta core pasa mey mey di auto, nan no ta bisti helm. El a mustra caminda ta mira un mama ta core cu su yiu riba step. E hurista a mustra cu tabatin lamentable caso cu morto door di e stepnan aki. Na opinion di e hurista, Gobierno ta haya cu tin un free for all caminda e turistanan cu step ta yega para unda cu nan kier, usando tereno di Gobierno sin cu nan tin permiso pa esaki y ta paga belasting. E hurista ta haya cu e companianan mes ta responsabel pa a haya nan mes den e situacion aki.
Hues a bisa cu e ta bay studia e caso y dia 22 Mei 2026 lo tin sentencia
