Den e dianan aki nos lo wordo recorda e lucha di e gran lider Betico Croes d.f.m., pero tur e palabranan bunita no lo tin e nificacion cu Betico Croes a logra inculca cerca nos pueblo dia cu pa prome bes a hisa nos Bandera y canta nos Himno 45 aña pasa. Nos Himno y Bandera cu a simbolisa nos Identidad, Union y Libertad. P’esey e pregunta kico realmente e aña aki tin di celebra? Pa UPP 25 di januari 2021, ta un dia pa recorda e gran estadista aki y su lucha, pero mas ainda un fecha pa nos por medita, reflexiona y haci compromiso nobo y serio cu nos Pais, den memoria di e Precursor di Nos Patria!!

E pandemia tin consecuencianan devastador pa nos economia, pero ta nos forma di goberna y hiba politica di ultimo añanan, e sistema di patronahe y faborecimento di ultimo decennia ta e causa principal di e desastre financiero loke a hiba nos na e situacion actual, esta na rudia di Hulanda. Betico Croes semper a bisa nos, “Mas bal muri riba pia, cu biba na rudia.” Parce Aruba a scohe pa “biba na rudia”, pasobra e realidad amargo ta cu nos a demonstra di no ta merecedor e Status Aparte. Pa colmo ta e mesun partido cu e gran homber aki a funda, ta e co-autor intelectual di e traicion. A core firma un acuerdo den pura pa acepta un RAFT y un COHO entregando nos autonomia pa por lo menos 7 aña y minando e posicion di nos Parlamento, cu al final ta e poder soberano di nos pueblo.

UPP ta kere cu riba e dia y aña aki no tin ningun motibo pa romantisa e lucha y logro di e Status Aparte. E fecha natalicio di Betico Croes mester ta e aña, un momento pa nos reflexiona y splica pueblo pakico a entrega nos Status Aparte sin mas den un habri y cera di wowo, pasobra esaki no ta loke Betico Croes y su generacion a premira pa nos y nos futuro generacionnan. Mayoria di nos pueblo cu a lucha sam sam cu Betico Croes no t’ey mas pa duna testimonio berdadero di e gran esfuerso cu tabata necesario pa por canta na bos halto: LIBERTAD. P’esey UPP ta puntra su mes kico a haci den transcurso di añanan pa educa e generacionnan desde 1986, e motibo pakico mester ta orguyoso di e lucha y Status Aparte aki?

Aruba ta pasando den tempo dificil. Un situacion NO crea, pero acelara pa COVID-19 pasobra e direccion cu nos Aruba a tuma desde 2010 y mas ainda desde 2014, laat of tempran lo a hinca nos den e situacion cu nos ta aden. A goberna of malogra e pais aki sin pensa cu tin mañan. NO a pensa di traha dam pa warda awa (kizas e gobernantenan si a haci esaki pa nan mes). Y na momento cu destino fatal y desastroso a dal nos, nos no tabata prepara pa esaki.

Peor ainda! Pa defende nos pais y enfrenta e retonan, nos no tabata tin e genio, e pudor y e racionalidad, pa den union mira pais Aruba na prome lugar, manera tabata e siñanza y soño di e gran lider Betico Croes. Al contrario e partido den oposicion y partidonan di coalicion actual a scohe pa sigui cu e polarisacion y desunion. E egocentrismo, e faboritismo y e color politico tabata mas importante cu e bandera di nos pais Aruba.

UPP tabata e unico partido cu na april 2020 a bolbe pidi nos gobierno y nos Parlamento, mescos cu na 2014 y 2017, pa ban den un dialogo nacional den un forma transparente y cu participacion di tur gremio crea un Compromiso Nacional, un frente nacional pa atende nos problema cu Hulanda. Y por medio di un gabinete nacional of zakenkabinet, no solamente enfrenta e retonan di e pandemia cu tabata menasa nos, sino tambe mustra Hulanda cu pa nos Aruba ta na prome lugar. A prefera di keda pone color di partido na prome lugar enbes di asumi e amor patrio, pa den unidad di tur gremio, sindicato y partidonan politico sali na vanguardia di nos pais Aruba y di e pueblo Arubano.

Riba Dia di Betico nos no mester ta di hubilo. Sino nos mester ta den reflexion. Nos mester tin berguensa di pensa cu awe Betico Croes lo ta orguyoso di e pais cu el a soña di tin pa su pueblo. Nos ta kere cu riba su dia, Betico mas bien lo ta deramando lagrima pa loke su mesun hendenan a haci cu su obra. Pero por otro. Nos por sigui e ehempel di Betico. Lanta for di rudia y traha duro pa logra e MANECE NOBO, si di berdad nos stima e baranca aki. Esaki por unicamente si nos bay goberna e pais aki na un otro manera, cu di loke nos a bin ta haciendo. P’esey e aña aki UPP ta papia di Reboot 2.0, ya cu nos NO por sigui goberna Aruba di e manera aki. Eleccion 2021 mester marca e era di un comienso nobo, E MANECE NOBO pa Aruba y su pueblo.

Lider Betico, Sosega na Paz!

Lider di UPP

Booshi Wever

22 januari 2021

LEAVE A REPLY

Please enter your comment!
Please enter your name here