Dia 25 januari nos ta celebra dia di Betico Croes, nos libertador. Un dia cu a wordo decreta como un dia nacional pa gobierno di Aruba pa asina conmemora y celebra e dia grandi aki pa nos pais Aruba.
Betico Croes q.e.p.d. ta un estadista grandi pa Aruba y nos libertador. Betico Croes ta esun cu a lucha incansablemente pa awe nos tin nos libertad, nos Status Aparte.
Awe nos tur por ta orguyoso cu nos ta un pais cu nos propio himno, nos propio bandera, nos escudo, nos propio moneda, banco central, Parlamento y nos propio gobierno. Promer cu aña 1986 esaki no tawata e caso.
Cu awe mi por ta forma parti di Movimiento Electoral di Pueblo MEP ta un honor y orguyo pa por sigui cu e lucha y ta parti di e prestigioso partidi aki.
Betico Croea a siña nos tur ni con chikito bo por ta, laga bo voz resona, lucha te ora bo logra y tin curashi pa lucha. Awe nos tin nos Status Aparte cu danki na e schrapmento di e fecha di independencia na aña 1994 door di ex promer minister Nelson Oduber cu nos por a mantene nos Status Aparte. Ta nos tarea di politiconan di e siguente generacion pa mantene e historia di Betico Croes bibo y percura pa nos sigui conserva nos Status Aparte.
Pais Aruba mester ta eternamente gradicido pa loke Betico Croes a haci pa nos tur. Un homber determina cu un vision pa futuro y cu tawata comprometi pa logra su metanan.
Danki Betico Croes pa nos libertad y laga nos tur reflexiona riba e dia aki con importante su lucha tawata pa nos tur.
