E tema pa Dia di Tera 2025 ta NOS PODER, NOS PLANET esaki ta e mensahe, invitando tur hende mundialmente pa uni tras di energia renoba y pa triplifica e produccion global di electricidad limpi pa 2030. Con? Uni na e Dia di Accion pa Tera stimulando tur hende pa tuma accion, educa, boga y mobilisa. Hasi un compromiso di accion pa e conservación di tera riba medianan social. Asistí, planea y registra un evento lokal. Integra curso di Dia di Tera den bo curiculo y apoya nos esfuersonan ta e mensahe di United Nations.
Tuma accion awo
Tuma decicionnan corecto tocante energia pa bo famia y excigi un desaroyo rapido di energia renoba di parti di bo gobernante, industria y negoshinan.
Pa 55 aña Dia di Tera a guia e mundo den concientisa y tuma accion riba temanan medioambiental cu ta di importancia. Nos ta boga pa salud di nos planeta, pa nos aire, laman, solo, ecosistema, animalnan silvestre y salud humano.
Riba 22 di april 2025 Dia di Tera lo cumpli 55 aña cu 192 pais y mas di un biyon hende mudialmente cu ta enespera pa partisipa. Esaki ta demonstra con e movecion divercifica di Dia di Tera ta sigui biba y compromete mescos cu na 1970 cu a uni tur hende pa logra un mihor futuro.
Poder di pueblo for di su raiz
Semper poder di pueblo a y ta e curason di Dia di Tera y esey mes ta e motor di cambionan fundamental. Ora hende ta uni cu e mesun meta comun nan por vense sistema y industria cu ta mustra di ta imposibel pa cambia.A medida cu nos ta yega na e momento importante aki nos ta celebra un realidad transformativo: nos ya tin e solucionnan cu nos mester pa crea energia limpi, barata y sin límite pa tur hende riba planeta via energia solar, biento y otro technologia renoba.
Pa Dia di Tera 2025
Laga nos compromete nos mes pa usa Energia Renoba pa construccion di un futuro saludabel, sostenibel, husto y prospero pa tur hende. Laga nos compromete awe na energia renoba.
Triplifica e produccion di energía renoba pa 2030
Pa aña 2030 Paisnan manera Merca por cumpli cu tur nan nesecidad di energia via fuente renoba tur dia di aña. Esey ta motibo pa nos yama pa un triplificacion global di produccion di energia renoba pa 2030. Energia renoba ta un forsa potente uniendo País, region, estado y comunidad cu regularmente ta conta den politica y economia. Energia limpi ta bai mas leu cu un idea of ideologia. E ta demostra su balor universal como un fuente di energia cu mester ta pagabel pa tur hende.
Costonan di Energía Renoba ta bahando rapidamente
E costo pa fabrica Panelnan Solar a baha dramaticamente den e ultimo añanan haciendo esaki nan mas pagabel y e forma di electricidad mas barata awendia. Entre 2010 y 2020 e modulonan solar a baha te cu 93%. E costo promedio global pa proyectonan solar a baha pa 85% den mesun periodo.
Beneficio di salud di energía limpi
Energia renoba por trece un briyante revolucion humanitario. Pa prome biaha den historia nos tin un caminda pa suministra energia sin limite y barata pa tur hende.
3.8 bion di hende lo yega e “Modern Energy Minimum” (MEM), cu ta menos cu 1.000 kWh pa persona pa aña. Energia renoba por cambia e situacion, subi nivel di bida y mehora salud di e siguiente forma.
- Contaminacion di aire di kimamento di fuel foslil; ta relaciona cu ataca di curason, athsma, problema respiratorio y mas.
- Menos Contaminacion ta bai disminuí enfermedad respiratorio y cardiovascular. (Fuente: WHO)
- Salud di hende muher ta mas afecta pa pollusion di aire y awa contamina; riesgo pa cancer di pecho, problema di ovario, y complicacion maternal.
- Menos emicion di gas cu ta causa cambio climatico ta yuda prevení riesgo di ola di calor, innundacion y infeccionnan. (Fuente: IPCC)
- Mehora salud mental; reduci stress y ansiedad relaciona cu polucion, cambio climatico, polucion di sonido y desaster ambiental. (Fuente: CDC)
- Menos morto; menos malesa relaciona cu calidad di aire. (Fuente: NIEHS)
- Menos polusion di awa; mehoracion di di calidad di awa ta yuda baha riesgo di malesa trasmití via awa. (Fuente: EPA)
- Menos gasto pa cuido medico, menos malesa di polucion, menos presion riba sistema di salud (Fuente: Harvard T.H. Chan)
Energia Renoba y Agricultura
Den transcurso di añanan por a tuma nota cu Aruba tambe a cuminsa cambia di pensamento. Hopi ta esnan cu awendia a cuminsa pensa den Energía Ronoba. Invertiendo den Panelnan Solar pa cas. Por tuma nota tambe varios vehiculon eléctrico riba nos isla cual ta hasi cu Agencianan di auto tin un demanda riba esaki. Diferente establecimiento, Tereno y casnan tin luznan solar. Mescos ta conta tambe den cameranan di seguridad cu tambe ta solar awendia.
Aruba por a cuminsa tuma nota di innovación den Sector Primario caminda cu tin productornan local ta invertiendo den autonan eléctrico personal c unan ta move diariamenrte. Hunto cu esaki ta invertiendo tambe den autona electrico pa por hasi entrega di nan productonan na clientela. Tin algún proyecto Hydroponico cu tin Panelnan Solar pa yuda baha nan gasto y asuina mantene e prijs di nan producto competitivo
Algun ehempel di uzo di fuente di energia limpi riba cunuco pa proteha e medio ambiente y baha gasto.
Tipo di Energia Renoba:
- Solar – Duna energía pa luz, irrigacion, pomp y porta, secamento di grano, fruta y herbal.
- Aire – Genera electricidad cu turbina, colecta awa subteranio
- Bio-energia – Cambia desperdicio den biogas y biocombustibel.
- Geothermico – Controla temperatura den di tera y aguacultura.
- Hydro-energia – Usa awa pa crea energia.
A medida cu nos planeta ta enfrenta retonan climatico grandi Sector Primario lo por bira mas resistente y sostenibel dor di implementacion di energia renoba.
For di sistemanan di irrigacion solar te ekiponan cu ta funciona cu biogas hopi agricultor ta yega na solucionnan limpi cu ta yuda proteha medio ambiente, baha gasto, y duna mas independencia energetico. Energia Renoba ta transforma agricultura for di su raíz cu e tipo di invercionnan aki. Agricultornan ta bira “guardiannan” di tera y líder den lucha contra cambio climatico. Gobierno, Banco y organisacionnan climatico mester ofrece mas ayudo pa promove uso di energia renoba den Agricultura, incluso via fondo, formacion y credito.
Mira Dilanti
Den un mundo cu Sector Primario mester adapta na e reto di e siglo aki, energia renoba lo sigui ta un pilar importante pa garantisa seguridad di cuminda, stabilidad economico y sostenibilidad ambiental. Un visión importante tambr cu nos isla lo mester cumpli cune pa hasi di Aruba un isla cu un Sector Primario robusto y resiliente
