Aruba: En coneccion cu dia internacional di obesidad, Departamento di Salud Publico Aruba kier a comparti informacion tocante e campaña “Sa bo number”.
Awe dia 4 di maart ta pa pone enfoke riba e tema di obesidad y su riesgonan pa nos salud fysico, mental y emocional. Un peso saludabel ta uno cu e persona tin balance entre nan haltura, edad, peso y genero. Sobre peso ta significa cu e persona tin un peso cu ta mas halto den rango saludabel pa su edad, haltura, peso y sexo. Y obesidad ta persona cu tin un sobre peso mas severo. Aruba tin 80% di populacion adulto cu tin sobre peso, y e 50% di e 80% aki ta obeso. Nos tin 50% di mucha di 10 aña tin sobre peso.
Cu obesidad tin hopi riesgo, den hopi caso persona nan no ta nota esaki pa motibo di e percepcion di kico ta sobre peso of obesidad ta robes. Den obesidad nos no por pone solamente un tipo di causa ya cu tin diferente factor cu por afecta un persona pa ta obeso:
1. E por ta den algun famia (aanleg),
2. Habito di come malo,
3. Habito di no come suficiente,
4. Habito di no ta active,
5. Stress di trabou/ economico,
6. Stress di famia,
7. No drumi suficiente ora tur dia
8. Habito di come cuminda fasil (junk food)
E consecuencia di obesidad ta cu e por causa sucu (diabetes), cholesterol halto, presion halto y por nota cu tur esaki por ponebo na riesgo pa haña un stroke, atake di curason, of por bira un pacient di dialise cual por yega ta perde bista, perde pia te hasta den algun investigacion e por causa cierto cancer nan.
Pa e motibo aki Ibisa conhunto cu seccion di Promocion di Salud ta reactiva e campaña “sa bo number”. Promocion di Salud kier enfatisa e comunidad pa tuma iniciativa y responsabilidad social, di midi cintura regularmente na cas. Awe durante rueda di prensa a presenta un un video instruccional pa e comunidad di Aruba pa persona di 16 te cu 60 aña por wordo educa con pa hasi esaki nan mes. E video aki lo ta poni disponible na tur media social di Departamento di Salud Publico, Ibisa y na Facebook di Ministernan di Salud Publico, Deporte y Asunto Social.
E campaña aki ta netamente e comienso di hopi mas cu Departamento di Salud Publico lo bai traha conhunto cu Ibisa y otro organisacionnan pa duna e comunidad di Aruba mas informacion y instruccion di con pa trese cambio saludabel den nan habito y tambe pa tin un mihor calidad di bida.
Pa tur informacion por sigui e pagina di Facebook di Directie Volksgezondheid DVG Aruba of yama riba 522-4200.
