PAKICO UN DIA MUNDIAL DI ABEHA Y POLINISADOR
Abeha y otro polinisador manera barbulet, raton di anochi, blenchi y hopi otro especie di animal y insecto ta ser menasa pa actividadnan di ser humano, Polinisacion ta un proceso fundamental den e sobrevivencia di ecosistemanan. Casi 90% di tur mata cu ta florea ta depende completamente of grandemente riba polinisacion animal, y mas cu 75% di e cultivonan agricola y 35% di e areanan di agricultura global.
Abehanan ta bou menasa. E tasa di extincion pa especienan ta 100 pa 1000 biaha mas halto cu normal y ta causa pa impactonan humano.
Cerca di 35% di polinisador invertebrado, particularmente abeha y barbulet, y como 17% di polinisador vertebrado manera raton di anochi, ta enfrentando extincion mundialmente.
Si e tendencia aki continua, cultivo nutritivo manera fruta, nues, y hopi verdura lo (mester) ser substitui pa cultivo basico manera batata, aros y maishi resultando den un dieta hopi inbalansa.
Nacionan Uni a designa 20 mei como Dia Mundial di Abeha mediante resolucion A/RES/72/211 na 2017.
Mediante celebracion di Dia Mundial di Abeha cada aña nos ta eleva e concientisacion pa e papel cu abeha y otro polinisador ta hunga den mantene ser humano y nos planeta Tera saludabel, y alabes riba e cantidad di reto cu e abehanan ta encontra y enfrenta awendia, hopi di nan na man di ser humano mes.
E TEMA PA 2025: HAÑA INSPIRACION DI NATURALESA PA NUTRI NOS TUR
E tema di e aña aki, “Haña inspiracion di naturaleza pa nutri nos tur” ta destaca e papel fundamental cu abeha y otro polinisador ta hunga den sistema agroalimentario y e salud di ecosistemanan di nos planeta. Berdad ta, cu cada dia mas polinisadornan ta ser amenaza dor di perdida di habitat, practica agricola poco sostenibel, cambio climatico y contaminacion. E reduccion den cantidad natural di e polinisadornan ta pone na peliger e produccion di alimento, ta aumenta costo y ta empeora e insiguridad alimentario, especialmente den comunidad rural.
Polinisacion ta esencial pa e sistemanan agroalimentario, pasobra eta contribui na e produccion di mas di 75% di cultivo di mundo, incluyendo fruta, verdura manera lechuga, fruta seco y semiya. Ademas di aumenta e rendimento di cultivo, polinisadornan ta mehora e calidad y diversidad di alimento.
Mas di 200 000 especie animal ta polinisador, e gran mayoria di nan den mondi, entre nan barbulet, parha, raton di anochi y mas di 20 000 especie di abeha.
Abeha y otro polinisadornan tambe ta sirbi como indicadornan di e salud di medio ambiente, proporcionando informacion tocante e ecosistema y e clima. Proteha e polinisadornan tambe ta mehora biodiversidad y servicionan di ecosistema fundamental.
Practica agrícola cu ta respeta naturaleza, manera agroecologia, crop rotation, agroforesteria y e maneho integral di plaga, ta ayuda proteha polinisadornan, garantisando cosecha stabil y reduciendo e escases di alimento y e impacto ambiental.
Esfuerzonan poni den marcha pa e proteccion di polinisadornan ta promove den ultimo instancia e conservacion di otro componente di biodiversidad, loke ta mehora servicionan di ecosistema manera e control di plaga, fertilidad di tera y regulacion di calidad di aire y e ciclo di awa. E adopcion di un enfoke holístico cu ta garantisa e coexistencia a largo plazo di practicanan agricola pa e produccion di alimentonan, fibra y combustibel ta necesario pa logra sistema agroalimentario sostenibel.
Nos tur por haci algo pa salvaguarda e futuro di e polinisadornan
ABEHA NA ARUBA 2025: ABEHA MENAZA, NEGLISHA Y ABANDONA
Agricultornan na Aruba ta usa relativamente poco pesticida y mas tanto ta usa practica di agricultura organico. Pero na Aruba e uso di pesticida, fungicida, herbicida y miticida ta un practica comun tanto den uso residencial como comercial den hardin y landscaping.
Biologonan a encontra mas di 150 diferente residuo chimico den polen di abeha, un cocktail fatal segun e investigador y apicultor Eric Mussen di University of California.
E European Food Safety Authority a produci un rapport cientifico identificando tres pesticida cu un uso hopi amplio, esta e compuestonan neonicotinoida conoci como clotianidina, imidacloprid y tiametoxam cu ta presenta riesgo severo pa abeha. Un rapport cientifico produci pa Greenpeace, titula “Bees in Decline” ademas di e tres compuesto ta identifica cuater pesticida mas peligroso pa abeha, esta clorpirifos, cipermetrina, deltametrina y fipronil.
E Pesticide Action Network Europe ta aplaudi e “EU Guidance Document on the risk assessment of pesticides on bees”, indicando cu por fin Union Europeo ta implementando un maneho mas efectivo pa proteha abeha contra uso di pesticida peligroso. Pero na mesun momento agencianan di Union Europeo ta indica cu proteccion di polinisador ta fayando. E rapport di European Court of Auditors di 2020 titula “Special Report-Protection of wild pollinators in the EU-Commission initiatives have not borne fruit” ta indica incumplimento cu medida adopta
Na Aruba no ta regla pa ley e uso di insecticida, pesticida, fungicida y miticida, ademas perdida di habitat causa dor di maneho di zonificacion no sostenibel pa acomoda e sobredesaroyo di turismo ta pone sobrebibencia di polinisador manera abeha y raton di anochi na peliger.
Y awo tin un otro peliger na horizonte, un enfoke robes riba aumento di siguridad almentario mediante expansion di agricultura usando tecnologia avanza, pero divorcia di naturaleza.
Un rapport a sali na februari 2025 di e compania PRIVA, titula “Onderzoek naar Optimalisatie van Commerciële Kasteelt op Aruba” riba agricultura cu indoor farming den greenhouse cera.
E problema ta cu e cultivonan principal usa pa ser humano, entre otro arros, maishi, trigo,batata, cassava, caña di sucu, bacoba no por ser cultiva den greenhouse.
Y mayoria di fruta y berdura cu ta rekiri polinisacion di flor pa nan produccion tampoco.
Berdad ta cu mayoria tecnologia agricola di greenhouse no ta utilisa polinisador natural, pero entre otro technica di polinisacion manual of automatisa.
Den e rapport agricultura cu ta respeta naturaleza y polinisador natural no ta ser considera pa aumento di produccion agricola na Aruba y ( tecnologia nobo pa) agricultura tradicional na Aruba a keda neglisha y cu esaki e proteccion di polinisadornan ignora.
E rapport no ta menciona polinisacion y polinisador mes y ta menciona crea un Agro Innovation Park pa indoor greenhouse farming loke ta indica un rumbo robes pa agricultura na Aruba.
