Tur aña, 3 mei ta e fecha cu Naciones Uni ta celebra e principionan fundamental di libertad di prensa, ta evalua e libertad di prensa rond mundo, y ta boga pa defende e medionan di prensa contra atakenan dirigi contra nan autonomia y ta paga tributo na e periodistanan cu a perde nan bida eherciendo nan profesion.
E dia internacional aki a ser proclama pa e Asamblea General di Naciones Uni na 1993, siguiendo un recomendacion adopta na e di bintiseis sesion di e Conferencia General di UNESCO na 1991. Esaki na su turno tawata un seguimento riba un yamada di periodistanan Africano cu na 1991 a produci e clave ‘Windhoek Declaration on media pluralism and independence”.
E Declaracion di Windhoek ta un pronunciamento di e principionan di un prensa liber, crea dor di periodistanan di corant africano durante e UNESCO seminar on “Promoting an Independent and Pluralistic African Press” , cual a ser teni na Windhoek, Namibia, di 29 april te cu 3 mei 1991. E documento aki ta señala e necesidad pa un prensa liber, independiente, pluralistico mundialmente, caracterizando un prensa liber como un ingrediente esencial pa democracia y alavez un derecho humano fundamental.
E Declaracion di Windhoek tawata un yamada pa cuminza un lucha pa proteha e principionan fundamental di libertad di expresion manera ancla den Articulo 19 di e Declaracion Universal di Derechonan Humano, cual ta bisa:
“Tur hende tin e derecho di libertad di expresion y opinion, cual derecho ta inclui e libertad pa mantene opinionan sin interferencia y pa busca, ricibi y distribui informacion y idea mediante cualkier medio y sin restriccion di frontera.
2022 Tema: Periodismo bou atake digital
E tema di e aña aki pa Dia Mundial di Libertad di Prensa ta Periodismo bou Atake Digital, cu ta resalta e multiple formanan den cual periodismo, libertad di expresion y privacidad ta ser afecta pa avanzenan recien den tecnologia di vigilancia, inteligencia artificial y big data mining y atakenan riba periodista a traves di medionan social y atake cibernetico, cu tur e consecuencianan cu esaki ta trece pa e confianza di publico den e canalnan di comunicacion digital.
E ultimo UNESCO World Trends Report Insights informe pa discusion publico “Threats that Silence: Trends in the Safety of Journalists,” ta destaca con vigilancia y atakenan digital y cibernetico ta pehudica y pone na peliger periodismo.
Vigilancia (surveillance) por expone informacion compila pa periodista, incluso di denunciantenan (whistle blowers, klokkenluiders), ta viola e principio di proteccion di fuente, cual ta un rekisito universalmente reconoci como esencial pa libertad di prensa y ta ancra den Resolucionan di Naciones Uni. Vigilancia tambe por perhudica e seguridad personal di periodista dor di publica of haci accesibel informacion personal sensitivo, cual por ser utiliza pa acoso y persecucion arbitrario hudicial of atakenan fisico.
Tin un creciente presion mundial pa promove y crea mas transparencia en cuanto e forma cu companianan grandi di Internet y particularmente medionan social ta explota datonan personal di usuario di Internet, con e datonan ey ta informa modelonan predictivo y inteligencia artificial, y con esaki nan por permiti amplificacion di desinformacion y odio.
Esaki a keda subraya den e Declaración di Windhoek+30, cu ta pidi empresanan tecnologico pa “traha pa garantiza e transparencia en relacion cu nan sistemanan humano y automatiza”.
Mensahe di Secretario General di Naciones Uni Antonio Guterres pa 2022
Riba Dia Mundial di Libertad di Prensa, nos ta destaca e trabou esencial di periodista y trahador den medionan di comunicacion cu ta busca transparencia y rendicion di cuenta di esnan den poder, hopi biaha cu riesgo grandi personal.
A lo largo di e pandemia di Covid-19, hopi trahador den medio di comunicacion tawata den prome linea, brindando informe preciso basa riba ciencia pa informa esnan encarga cu tuma decisionan y salba bidanan. Na e mesun momento periodistanan, cubriendo cambio climatico, biodiversiad y contaminacion a logra crea atencion publico pa e triple crisis planetario aki.
Pero e amenazanan pa e libertad di periodista y trahadornan den medionan di comunicacion ta aumenta día pa día. Den tur tema, for di e salud global te cu e crisis climatico, corupcion y abuso di derechonan humano, periodistanan ta enfrenta cada vez mas mayor politizacion di nan trabou y intento pa silencia nan for di tur skina.
Tecnologia digital a democratiza e acceso na informacion. Pero tambe a crea retonan serio.
E modelonan comercial di hopi plataforma di medio social ta basa no ariba aumenta acceso na informacion veridico y correcto, pero mas bien riba aumenta e base y interaccion di usuario– locual frecuentemente ta nifica provoca indignacion y plama mentira
.
Trahadornan den medio di comunicacion den zona di guerra no ta ser menaza pa bomba y bala so, pero tambe pa arma di falsificacion y desinformacion cu awendia ta acompanja guerra moderno.
Nan por ser ataca como e enemigo, acusa di espionahe, deteni of simplemente asesina pa e mero hecho di haci nan trabou periodistico.
Tecnología digital tambe ta facilita mas ainda censura. Hopi periodista y editor rond di mundo ta constantemente corre e riesgo di hanja nan programan y informenan desconecta for di Internet.
Y tecnologia digital ta crea canal nobo pa opresion y abuso. Periodista femenino ta corre un riesgo particular di sufri atake y violencia online. UNESCO a descubri cu casi tres di cada cuater hende muher periodista a yega di experiencia violencia online. Hacking, atakenan cibernetico y vigilancia ilegal (tapmento) tambe ta stroba periodista di haci nan trabou.
E metodonan y herment ta cambia, pero e meta pa discredita medionan di comunicacion y purba skonde e berdad semper ta keda mescos.
E resultadonan tambe ta mescos: personanan y sociedadnan ta incapaz pa distingui realidad di ficcion (politico) y por ser manipula den forma horrible.
Sin libertad di prensa, no tin verdadero sociedad democratico. Sin libertad di prensa, no tin libertad.
Naciones Uni ta traha pa apoya periodista y trahador den medio di comunicacion tur caminda. Dies aña pasa a establece un Plan di Accion riba Seguridad di Periodista, pa proteha e trahadornan di medionan di comunicacion y caba cu e impunidad de delitonan cometi contra periodista.
Riba Día Mundial di Libertad de Prensa, nos ta honra e trabou esencial di medionan di comunicacion di bisa esnan na poder nan berdad, exponiendo nan mentira y yudando crea institucionan y sociedadnan fuerte y resiliente.
Nos ta haci un apelacion na tur gobierno, organizacion di media y compania tecnologico di mundo pa apoya e esfuerzonan crucial aki.
DIA MUNDIAL DI LIBERTAD DI PRENSA, SITUACION DI ARUBA
Rainbow Warriors Core Foundation, cu hunto cu periodista na Aruba a denuncia atakenan riba libertad di prensa y periodistanan na Aruba y e intencion pa introduci un Mediaraad lo saca un raport riba libertad di prensa y libertad di expresion for di perspectiva di Naciones Uni y UNESCO, Reino Holandes y Union Europeo y tambe for di e perspectiva di Latino America y Caribe.
E raport aki lo ser publica na fin di Mei y duna amplio y detayado informacion basa riba documentacion di investigacion academico y datonan veridico, entre otro riba framework legal y en particular riba checks and balances, salvaguardia pa funcionamento di prensa liber, autoregulacionan di medionan di prensa y tambe e cuchu di dobbel fila cu yama mediaraad (press and media councils).
