Oceanonan di mundo ta haci Tera habitabel pa humanidad. Awacero, awa potabel, clima, tempo, costa, gran parti di nos cuminda y incluso e oxigeno cu nos ta respira ta bin di oceano den ultimo instancia y tur ta ser regula pa nan. Oceano y laman ta canalnan vital pa transporte y comercio.
Utilisacion prudente di e recurso aki ta clave pa un futuro sostenibel. Sinembargo, e actualidad ta cu tin un deterioro continuo di nos awanan costero, debi na contaminacion y acidificacion, locual tin un efecto adverso riba e funcionamento di ecosistema y biodiversidad y tambe afectando pesca artesanal. Areanan marino proteha mester ser administra di un manera debido cu suficiente recurso disponibel y regulacion pa reduci sobrepesca, contaminacion marino y acidificacion di oceanonan.
Pa tur e razonan aki Asamblea General di Naciones Uni a dicidi cu entrante 2009, Naciones Uni lo celebra 8 juni como Dia Mundial di Oceanonan, mediante Resolucion 63/111, di 5 december 2008.
Tema pa 2023: Planet Ocean: Tides are changing
Oceanonan ta cubri mas di 70% di e superficie di nos planeta. Nan ta nos fuente di bida dunando sustento na humanidad y tur otro organismo riba Tera y ta produci 50% di e oxigeno y ta hogar pa mayor parti di e biodiversidad mundial y fuente principal di proteina pa mas di un biyon hende.
Apenas un porcion chikito di e oceanonan a ser explora, y cu technologia moderno ta descubriendo e enorme biodiversidad den e profundidad di oceanonan cu te awor no a ricibi mucho atencion.
Pero e mareanan ta cambiando, y cambionan grandi a inicia.
Pa 2023 Nacionan Uni a pone Planet Ocean, Planeta Oceano como tema pa enfoca riba e necesidad pa gobiernonan, industrialista y ehecutivonan den sector priva, representantenan di sociedad civil, pueblonan indigena, streanan y personanan di farandula, activista y cientificonan bini hunto y traha hunto pa pone Oceano na promer lugar.
Na 2017 Nacionan Uni mediante resolucion A/RES/72/73 a proclama e Decada di Nacionan Uni di Ciencia Oceanico pa Desaroyo Sostenibel pa e periodo, cuminzando 1 januari 2021, y a invoca e Intergovernmental Oceanographic Commission di UNESCO pa prepara un plan di implementacion pa e Decada den consulta cu Estadonan Miembro di Nacionan Uni, organisacionan specialisa, fondo, programa y organismo di Nacionan Uni y demas otro entidad intergubernamental, NGOs y stakeholders. E motivacion pa e Decada tawata pa reverti e ciclo di deterioro di salud di oceanonan.
IOC-UNESCO a crea un Plan di Implementacion, y a formula un Roadmap, Obhetivo, Desafio y Meta pa logra, tur den e cuadro di e Obhetivonan di Desaroyo Sostenibel (SDGs). E metanan ta:
Oceano sano den cual e fuentenan di polucion ta identifica y reduci of removi
Oceano saludabel y resiliente cu ecosistemanan marino conoci, proteha, restora y maneha
Oceano productivo cu por sostene un suministro di alimento y economia marino sostenibel
Oceano predecibel na unda sociedad ta compronde y por responde adecuadamente na condicionan di oceano cu ta cambia
Oceano na unda bida y porvenir ta proteha di peligernan relaciona cu oceano
Oceano accesibel cu acceso equitativo na dato, informacion, technologia y innovacion
Oceano inspirador y atractivo na unda sociedad ta compronde y balora oceano en relacion cu bienestar humano y desaroyo sostenibel.
Na 2018 mediante resolucion A/RES/72/72 Nacionan Uni a proclama 2022 como Aña Internacional di Pesca Artesanal y Acuacultura.
Na 2019, cu resolucion A/RES/73/284 Nacionan Uni a adopta e Decada di Nacionan Uni pa Restoracion di Ecosistema (2021-2030), cu e meta principal pa restora ecosistema terrestre y marino y pone un paro na e perdida di diversidad biologico alarmante riba Planeta Tera.
Na 2021 mediante resolucion A/\RES/76/14 Nacionan Uni a designa 2022 como Aña Internacional pa Ciencia Basico pa Desaroyo Sostenibel.
Na 2022 a tene e Conferencia di Nacionan Uni riba Oceano, 27 juni-2 juli na Portugal den cual a adopta e Declaracion “Nos Oceano, Nos Futuro, Nos Responsabilidad” (A/CONF.230/2022L.1).
Na final di 2022 durante e 2022 UN Biodiversity Conference COP15-CP/MOP10-NP/MOP4 teni den dos parti na Montreal, Canada y Kunming, China a adopta e Kunming-Montreal Global Biodiversity Framework formulando 4 elemento clave pa logra pa 2050 y 23 meta pa logra pa 2030.
Na 2023 durante e di cinco sesion di e Intergovernmental Conference on Conservation and sustainable use of marine biological resources beyond areas of national jurisdiction a logra yega na un concepto pa un tratado, cual ta spera di lo keda adopta na e di seis sesion 19-20 juni 2023.
Na januari 2021 e Plastic Waste Amendments of the Basel Convention on the Control of Transboundary Movements of Hazardous Waste and their Disposal a drenta na vigor haciendo e tema di combati polucion di plastico un tema di prioridad.
Na maart 2022 durante e cumbre UNEA-5.2 na Nairobi ta adopta UNEA Resolution 5/14 “End plastic pollution: Towards an international legally binding instrument” (un Global Plastics Treaty).
Den un segundo sesion di e Intergovernmental Negotiating Committee pa desaroya un instrumento huridico cu forza di ley internacional pa combati polucion di plastico (INC-2), teni 29 mei te cu 2 juni 2023 na Paris na e sede di UNESCO a keda acorda pa mas o menos 170 pais pa cuminza traha un promer concepto pa e tratado pa keda presenta na November 2023.
SITUACION NA ARUBA
Aruba su laman falta di ley pa regula contaminacion y proteccion di biodiversid y recurso den un forma adecuado. Esaki pasobra falta pa implementa tratado y falta of tin ley actual deficiente:
No tin Landsverordening Milieubeheer
No tin un Landsverordening Maritiem Beheer pa fiha, regla, proteha y monitorea nos zona exclusivo economico riba laman y rikeza mineral den fondo den e area aki.
27 mei 1999 Reino Holandes a ratifica y implementa e Exclusive Economic Zone di Reino Holandes mediante e Rijkswet instelling exclusieve economische zone en cumplimento di exigencia di United Nations Convention on the Law of the Sea pa tal.Tur otro isla den Caribe Holandes, incluso St.Maarten y Curacao a institui nan zona exclusivo economico y tin un Ley di Maneho Maritimo. Aruba no tin nada regla.
Convenio pa Diversidad Biologico falta protocol pa implementa
Basel Convention on the Control of Transboundary Movements of Hazardous Wastes and their Disposal NO ta implementa
Convention for the Protection of the Marine Environment of the Wider Caribbean (Cartagena Convention) ainda falta pa implementa e importante LBS Protocol, Land-based Sources Protocol, cual ta regula polucion likido y solido cu ta yega laman di actividad riba tera.
Parke Marino Aruba no ta cubri costa completo y awanan teritorial. Tiramento di pisca cu speargun den forma controla, ta constitui desvia den forma di uitzondering di articulo 9 di e Ordenanza Nacional pa Proteccion di Naturaleza y ta viola Tratado pa proteccion y desaroyo di e medio ambiente marino di e area regional di Caribe (Tratado di Cartagena) y su Protocol concerniendo Areanan Proteha Especial y Bida Salvaje.
