No tin mas poeta cu poema
No tin mas cantante cu cancion
No tin mas Mama cu Mama Maria
No tin nada mas dushi
Cu e silencio di alegria
Haya den paz
Despues di un humilde oracion…..
Habriendo su halanan
Den cada alma, mente y curason
Cu awasero di cada consenshi
Ora bo tribi sondea y sambuya
Sinti den e spiel di bo alma
E profundidad alivia
E milagernan di mas aya…
Autor: Ruthy Vrieswijk-Bergen
Aruba, September 2005/2021 “SABIDURIA DEN NOS ALEGRIA”
Shonnan tur bon dia yen di sabiduria den nos alegria ! Nos a habri nos relato di e siman aki cu un bunita
poema di paz, ya cu dia 21 di September ta Dia Mundial di Paz, aunke no ta tur caminda riba mundo tin
paz. Nos a lesa recientemente di e situacionan dificil, complica y doloroso cu tin na Haiti y na Afganistan
cu tur e desordennan cu ta tumando lugar. Tin mas lugar y of pais na mundo na unda tin problemanan y
of protestanan contra nan gobierno y of contra otro gruponan den nan comunidad cu kizas no tin e
mesun pensamentonan cu nan. Ketobay nan kier forsa tur hende tuma e vaccuna contra e Corona Virus,
aunke tin hopi hende cu no kier y tin cu respeta esaki. Ta cada persona su bida, su escogencia, su
consenshi, su paz mental y spiritual. Paz no ta wordo bendi den tienda, ni di cuminda ni di alcohol.
Alcohol por yuda lagabo sinti “halto” pone’bo lubida bo problema y of dolor, y of tristeza pa un rato,
pero no pa semper. E unico paz duradero ta ora bo ta biba bon cu bo Dios. Bo no ta horta, bo no ta
mata, bo no ta envidia, bo no ta comete adulterio etc.etc. Ta asina bunita cu ora nos peca contra Dios,
nos por reza na Tata Dios den nomber di Hesus y pidie’le pordon y pa e yuda nos di no cay mas den
tentacion, ma libra nos di tur malo. Pero Tata Dios no ta un wega, cu , ay , mi ta sigui horta pasobra Dios
ta pordonami . Berdad no ta nos tur tin consenshi of ta arepenti di nos cosnan malo pero ta sigui kere
cu e ta algo normal di tur dia. Tin hende cu no por drumi bon anochi, pa motibo cu nan ta keda pensa
pensa y pensa riba ayera of mayan, lubida di biba awe, un dia, dia pa dia. Nos niun ta perfecto y nos ta
sigui comete errornan diaramente, sinja di nan y mehora nos mes pa bira un mihor hende. Ta asina
dushi pa drumi trankil, asina mes cu tin di nos cu ta lanta algun ves den anochi pa bay urina, pasobra ta
bon pa bebe hopi awa den dia y no laat anochi. Pero ta pega sonjo bek liher, pasobra e mente ta trankil,
e mente ta na paz. Ki bunita ta pa cana den e Labirinto di paz cu tin patras di Kapel di Alto Vista. Danki
na esnan cu ta tene esaki limpi di e yerba di mondi cu ta purba di tapele cu su capa berde,
principalmente ora awa a yobe. Shonnan, ban papia paz, ban sinti paz, ban desea otro paz, ban biba paz
! Cu respet mutuo , cu bon comportacion . Ora bo tin paz den bo mente, alma y curason bo ta sinti hopi
alegria, bo ta hari hopi, bo ta contento, bo ta felis. Aunke mil prueba ta sigui bin, Hesus su paz ta
mescos, manera ela priminti den su Santo palabra. Lady Ruth ta desea henter nos comunidad
multicultural “PAZ”, no solamente riba dia 21 di September , pero tur resto dianan di nos bida. Ban sigui
duna danki pa bida, pa salud, pa amor, pa cuminda y bebida, pa trabao, pa tur cos cu nos tin como
bendicion na abundancia. Specialmente e regalonan cu bo no por cumpra cu placa, manera pasenshi,
honestidad y alegria. Lady Ruth ta desea specialmente nos gobierno su gobernantenan nobo y tur esnan
cu ta ripiti den nan trabao, den nos gobierno hopi paz ! Cu screening of no, nan tambe sa cu tin un Dios
riba nan cabes. Cu tin algo interesante cu yama “Karma”. Traha serio, sembra bon pa e cosecha tambe
ta bon. Aruba ta kere den boso, Aruba sa cu boso ta hende mescos cu tur otro hende, cu su bon y su
malo. Laga e bon briya ! Traha cu sabiduria, cu amor pa bo prohimo ruman. Hopi sa, cu tur cos scondi lo
sali na cla un dia. Cuminsa cu un mente di paz nobo y inspira ! Cu gradicimento ! E ta un privilegio pa
sirbi bo pais. Nos ta pidi Dios su bendicion riba nos gobierno y tur cu tin un posicion importante na
bienestar di nos dushi isla. Laga Hesus ta bo luz y guia riba tur bo camindanan den bida.
