Aunke cu ya e weganan a cuminsa diahuebs, diabierna tabata tin e ceremonia di apertura riba veld di Kudawecha pa asina habri oficialmente e Copa Gubernamental y Comercial 2025. Depues di seis aña team organisado di Horacio Oduber Hospital (HOH) a trece e copa aki bek y por a mira cu interes tabata enorme y tribunanan tabata yena di fanaticonan apoyando e teamnan participando.
Cu presencia riba veld di invitadonan, presidente di parlamento, directornan y representantenan di e departamentonan gubernamental y comercial a duna honor na nos Himno di Aruba cu a ser canta pa colega Zulaika Geerman. Despues a invita presidente di parlamento, sr. Marlon Sneek, pa hiba palabra cu a duna importancia na deporte y cu un torneo asina ki ta esencial pa trece union entre instancianan gubernamental y companianan comercial. Ta sostene e iniciativa completamente y ta gradici e comision y sponsor cu por a realisa e torneo. sr. Gregory Croeze, miembro di Hunta di Directiva di HOH, ta contento cu e copa t’ey bek despues di seis aña y ta conta cu HOH ta kere firmemente den deporte cu ta algo bon pa salud y alabes ta trece colegialidad entre departamentonan y ambiente den nos comunidad.
Dr. Dave Laclé representando e comision di organisacion a gradici e gran sponsor Balashi Aruba pa kere den e copa aki y tambe a gradici Hunta di Directiva di HOH pa sostene y yuda realisa e copa. No lubida tur teamnan gubernamental y comercial cu ta participando y tur colega y boluntario trahando duro pa haci e torneo posibel.
Alabes Laclé a tuma un momento pa honra y dedica e torneo aki na tres baluarte di hospital cu a nifica masha hopi mes den deporte y tabata activo pa hopi aña durante cu nan tabata labora na Hospital. E personanan aki sigur no ta desconoci y a pone ‘in het zonnetje’ Raymond Bikker, Angelico (Leco) Croes y Edwin (Tinchi) Lopez. A otorga na Leco y Tinchi (sr. Bikker ta den exterior), un bunita reconocimento pa nan dedicacion na deporte di parti di Horacio Oduber Hospital.
Por ultimo a invita Marlon Sneek pa haci e sake di prome bala sigui pa un “Playball” door di Sr. Gregory Croeze. Y cu esaki Copa Gubernamental Comercial 2025 a keda inaugura.
E invitacion ta keda na comunidad di Aruba pa sigui apoya e siman aki y pasa Kudawecha Ballpark di diamars dia 24 pa diadomingo 29 di juni. Y corda cu riba e ultimo dia nos lo haya sa ken ta bay cu e copa di campeon, lo tin tremendo ambiente di e banda local OREO y alabes e entregamento di premio.
E bar y cushina lo ta bon surti. Bishita e Facebook di Horacio Oduber Hospital of e pagina di Copa Gubernamental 2025 pa mas informacion tocante e schedule y scores di tur dia. HOH semper t’ey y claro, den deporte nos tambe t’ey!
