Diabierna awor 15 December 2024, Corte di Husticia lo trata e caso penal cu Ministerio Publico a cuminsa contra 4 periodista, kendenan ta sospechoso den e caso penal contra ex agente di Polis, Vos.
SOLO DI PUEBLO por a compronde cu na Juni 2024 e caso mester a tuma lugar pero riba peticion di abogado, a pospone e tratamento pa asina a haci mas investigacion. Tabatin varios interogacion na Hues Comisario. Awor ta asina leu cu tratamento di e caso ta tuma lugar diabierna awor.
AGENTE DI POLIS CONDENA
Dia 9 December 2023, durante tratamento di e caso penal contra e ex agente Vos, Fiscal a bisa cu e ta haya Vos culpabel di tur e acusacionnan y a exigi 36 luna di prison (3 aña) di cual 8 luna ta condicional cu un tempo di prueba di 3 aña. Fiscal a exigi tambe cu pa 5 aña, Vos no por eherce e trabao di Polis.
Fiscal a bisa Hues cu tin 6 acusacion contra Vos.
– Entre Maart 2018 y 2023, Vos a malversa radionan di Polis,
– a horta radionan di Polis’
– a viola secreto di trabao door di facilita informacion na cierto media y instala aparatonan na su cas,
– a abusa di su funcion como Polis,
– a laga su mes wordo cumpra,
– a forma parti di un organizacion criminal.
Despues di a scucha defensa di abogado mr. de Sousa, Hues a pospone e caso pa mas o menos 45 minuut y a bolbe y dicta sentencia di biaha. Hues a bisa cu e no ta haya legalmente proba cu Vos ta forma parti di un organizacion criminal y a declar’e liber di e acusacion ey. Hues ta haya Vos culpabel di e otro acusacionnan. Hues a condena Vos na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña. E decision aki a haci cu dia 9 December 2023 atardi mes Vos a haya su libertad.
Ta asina cu Ministerio Publico no ta di acuerdo cu e sentencia y a apela esaki.
CASO CONTRA PERIODISTANAN
Dia 9 December 2023, Fiscal a bisa cu a cuminsa un investigacion riba e motibo cu cierto media prensa ta tur caminda promer cu Polis. Ta sospecha cu cierto media lo tabata scucha radio di Polis. Fiscal a bisa cu tabatin casonan penal den Corte caminda a castiga e agentenan y a kere cu esaki a stop e cierto media cu a haya castigo combina. Sinembargo no ta asina. El a bisa cu dia 16 Maart 2023, Cuerpo Policial a haci denuncia di ladronicia di radionan. A constata cu tabatin 3 radio na un localidad y tabata sendi. E cuater sospechosonan den e caso aki ta: Richard Lacle, Brian Koolman, Norben Giel y Nelson Cabral de Andrade.
E acusacionnan cu Ministerio Publico lo presenta den sala di Corte contra e grupo di 4 periodista ta:
– Den e periodo di 1 Januari 2021 te 22 di Maart 2023, conhuntamente, a ofrece un ambtenaar den funcion di Cuerpo Policial di Aruba regalo of promesa cu e meta pa hib’e na haci of keda sin haci algo contra deber di su trabao. an ta wordo acusa di, den e periodo menciona, conhuntamente, a intencionalmente viola secretonan di cual e tabata sa cu e ambtenaar, relaciona cu su funcion, tabata obliga pa tene.
– Nan ta wordo acusa di, entre 1 Januari 2021 te 22 Maart 2023, a participa na un organizacion cu tabata consisti di un y/of mas otro persona cu tabatin como meta pa comete crimennan, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.
Corte di Hustic a planea 2 dia pa tratamento di e caso aki. Dia 15 y 18 di November 2024. Dia 15 di November lo por spera exigencia di Fiscal y posiblemente defensa di abogado. A pone un dia di reserva 18 November 2024, pa si ta necesario lo tin reaccion di Fiscal y reaccion di abogado riba e reaccion di Fiscal. Despues Hues lo bisa si e lo dicta sentencia di biaha of si e lo fiha un fecha pa asina e studia e caso y despues dicta sentencia.
