Diabierna awor den sala di Corte di Husticia di Aruba, lo trata e caso penal di labamento di placa contra Benny Sevinger.
SOLODIPUEBLO por a compronde cu for di aña pasa, Ministerio Publico a cuminsa cu e caso caminda Ministerio Publico ta haya cu Benny Sevinger a laba placa. E caso a keda posponi riba peticion di abogado mr. David Kock, pa haya sentencia di Hof di Corte Superior. Awor tratamento di e caso lo tuma lugar.
FISCAL TA DEMANDA PA SEVINGER PAGA CASI 1 MIYON FLORIN
Na Mei 2024, Ministerio Publico a cuminsa e caso pa kita propiedadnan di Benny Sevinger. Esaki relaciona cu caso Avestruz, caminda Fiscal ta haya cu Benny Sevinger a haci labamento di placa. Fiscal a laga haci un investigacion financiero caminda ta demanda 940 mil florin, cu Benny mester paga. Abogado mr. Kock a bisa Hues cu Hof a bisa cu por spera cu na Juli 2024 lo tin sentencia den caso Avestruz. El a bisa cu e no a haya chens di investiga e rapportnan cu Ministerio Publico a manda. El a pidi Hues pa mihor warda riba sentencia di Hof. Hues a bay di acuerdo cu e peticion y a pospone e caso.
HOF A BAHA PISA RIBA BENNY SEVINGER
Dia 12 Juli 2024, Hof a dicta sentencia den caso Avestruz caminda Hof ta haya Benny culpable di malversacion diferente biaha y a laga su mes wordo cumpra. Tambe Hof ta haya cu Benny a usa su fundacion pa haya placanan y a malversa placa di e fundacion.
Hof a bisa cu kier manda señal bon cla cu corupcion den Gobierno no ta acceptable y tin castigo pisa. Hof ta haya cu Benny, a abusa di su posecion como minister.
Hof a condena Benny na 4 aña di prison di cual 1 aña ta condicional cu 3 aña di prueba. Ademas Hof a condena Benny cu pa 5 aña e no por postula su mes pa eleccion. Te ainda e caso no a wordo trata na Hulanda.
Na October 2024, a sigui cu un “regiezitting” di e caso penal di labamento di placa contra Benny, caminda a palabra cu lo tin mandamento di cartanan entre abogado mr. Kock y Ministerio Publico y cu 28 Februari 2025 tratamento di e caso ta tuma lugar. Esey ta nifica cu Diabierna awor lo tin tratamento di e caso.
