Un anochi intimo caminda famianan, amistadnan y sponsorsnan a presenta na Ocassions Ballroom pa asina haya e opportunidad di conoce e 6 candidatanan compitiendo pa e titulo maximo di Miss Universe Aruba 2024.
Aruba a sera conoci cu e 6 candidatanan, y tambe nan sequencia official pa e anochi final di Miss Universe Aruba cual lo tuma lugar dia 10 di Augustus na Marriott Ballroom. E sequencia pa Miss Universe Aruba 2024 ta lo siguiente, #1 ta Giulia Brezovar, #2 ta Sasha Williams, #3 Marie-Sonise Elliasant #4 Irveljen Hato, #5 Naomi Croes y #6 Anouk Eman.
Hunto, e Miss Universe Aruba ambassador Angie Dirksz y Andrew Steba, a dirige e anochi pa asina pasa palabra pa sra. Susanita Diaz Maduro, miembro di e organisacion, kende a dirigi su mes na nomber di National Director y Presidente Anoutcka Koolman-Burleson y My Dream Institute Foundation Aruba.
Durante e anochi aki, no por a laga afo e yegada di Rashida Smith cu a yega di Poland cu e titulo di Supra Model Caribbean y finalista di Miss Supranational 2024. Un pabien hopi grandi ta bay sigur na Rashida cu a trese e logro aki pa nos Isla Aruba.
Sigur di parti di My Dream Institute Foundation Aruba hunto cu su team di organisacion nobo, tur hende ta sumamente contento y satisfecho pa un anochi exitoso como e prome inicio di Road to Miss Universe Aruba 2024. Nos ta extende un palabra di graditud y aprecio na tur e sponsorn cu a yuda nos den un of otro manera pa asina por a haci e anochi aki uno exitoso y di hopi satisfaccion.
