Diadomingo 26 di april 2026, Fundacion Savaneta hunto cu Bureau Multifuncionele Accommodatie (MFA) y Santa Rosa ta organisa un actividad yama “Savaneta Food Market”, cu lo tuma luga rond di MFA Savaneta.
Segun presidente di fundacion, Norman Thijsen, e proyecto ta forma parti di un vision mas amplio pa desaroyo di comunidad, unda MFA ta wordo utilisa como un espacio central pa actividadnan social, economico y cultural. E iniciativa ta busca pa crea mas movimento den bario y duna productornan local e oportunidad pa conecta directamente cu consumidornan.
Thijsen a enfatisa cu e mercado no ta solamente un evento di benta, pero tambe un plataforma pa stimula agricultura local, fortalece economia di Savaneta y haci productonan fresco mas accesibel pa famianan. E iniciativa ta subraya importancia di colaboracion entre gobierno, institucion y sector priva pa logra sostenibilidad.
E evento lo inclui un mercado varia cu fruta y berdura, pisca y carni na prijsnan pagabel, hunto cu cuminda crioyo y otro productonan local. Tambe tin espacio pa empresarionan y negoshinan local pa participa y amplia nan actividad economico.
Representante di Santa Rosa, Randy Maduro, a indica cu rol di Santa Rosa ta pa conecta productornan local directamente cu comunidad. El a expresa su aprecio pa e colaboracion y a confirma cu e mercado ta forma parti di un esfuerso pa amplia acceso di producto local na diferente bario.
Maduro a splica cu, aunke Mercado di Santa Rosa tradicionalmente ta tuma lugar na otro area, awor ta integra den iniciativa manera esaki pa trece producto mas cerca di comunidad. Publico lo por haya un variedad amplio di producto, incluyendo carni fresco (baca, cabrito y porco), fruta, berdura y producto artesanal produci na Aruba.
Di parti di MFA, representante Jamil Werleman a expresa su gratitud pa e uzo di e facilidad, indicando cu MFA ta un espacio multifuncional crea pa sirbi comunidad y stimula participacion den bario. Segun e, MFA no ta solamente un edificio, pero un punto di encuentro pa desaroyo social y integracion comunitario.
E iniciativa ta conecta cu e vision di desaroyo comunitario impulsa bou liderazgo di Prome Minister Mike Eman, unda MFAnan ta hunga un rol importante den acerca servicionan na pueblo y fortalece cohesion social den diferente bario.
E proyecto ta conta cu sosten di Ministerio di Asuntonan General, Ministerio di Finanzas, Economia y Sector Primario, y Departamento di Santa Rosa.
Comunidad en general, specialmente habitantenan di Savaneta, ta invita pa bishita e evento domingo for di 9’or di mainta te 3’or di atardi, pa disfruta di un experiencia di compra cu producto local fresco.
