Gloria na Dios, pa e ultimo 25 anja tur diadomingo mainta , mi ta reuni cu mi amigo Johny Habibe den su oficina na Hit94FM. Y diadomingo mainta 29-12-2024 tabata mesun cos entre 8:15- 8:30 am.
Nos a papia, nos a hari e ta duna su comentario tocante e programma con e programma a crece durante anjanan, y ora mi ta bira bay bek den studio di Hit 94 FM Johny Habibe su ultimo palabranan na mi tabata:
“Marcel cuida curpa pasobra hopi di nos amigo y conocirnan no a yega final di 2024.”
Mi tin masha respet pa Johny Habibe y su yuinan, y ta pesey tin cosnan cu mester wordo comparti abiertamente pa hende por sa tur cos y duna balor na hende.
Johny Habibe su aporte na e Evangelio di Dios riba Aruba y Caribe Hulandes y resto di mundo tabata algo inmensamente grandi.
Mi a yega na anja 1999 serca Johny, buscando un oportunidad pa comparti e evangelio di Dios na Radio, cu pensamento pa expande Dios su palabra den tur forma, y asina duna Dios e prome lugar den curason di nos pueblo.
Johny Habibe a sinta papia cumi y puntrami : Marcel ta ki ora bo kier tin bo programma, y mi a bise di 6am – 9am y Johny a contesta: Ta hopi tempran , bo mester tin hopi displina y dedicacion, pasobra locual bo ta desea no ta un Yoke, pero ban purba y bo mes lo wak e resultado. Pasobra bo mester ta dispuesto, pa traha duro, y ademas bo no tin auto con bo ta yega na tempo?
Johny Habibe a dunami e challenge, e tabata lanta tur diadomingo mainta 5:45 am bin habri porta pami, pa asina mi por cuminsa cu e programma y 6:15am ora tur cos ta bon di setlle Johny tabata bay den su cas bek.Tabata despues di 1 luna y mey cu Johny Habibe a topami na porta, y a bisami : Marcel e hendenan a cuminsa cohe confiansa cu bo, bo ta manera un wekker pa e pueblo, ata e yabi y e combinacion di alarma. Y asina nos jornada a cuminsa.
Si mi conta cuanto mi a sinja serca Johny Habibe ta tuma mi dianan pa scirbi, nos a keda para hunto den tur tempo, cu Johny por a pasa aden y ami tambe por a pasa aden, nos a hari y nos a yora, nos a sinja for di otro. Nos tabata haci oracion hunto diadomingo mainta pa bienestar di Hit 94 y Mega 88. Pa su salud y pa salud di su famia y mi famia.
E ministerio radial a crece danki na Dios y na Johny Habibe, cu Johny Habibe nos a yega na organisa Marathon di Oracion cual otro anja lo cumpli 25 anja, y tabatin anjanan cu nos a bay 14 ora di oracion, si awe ami Marcel E Balootje ta conoci na radio den full Caribe Hulandes, Hulanda y otro partinan di mundo ta danki na Dios y Johny Habibe y henter e team di Hit94Fm.
Semper mi a tende di Johny pa sinja traha cu ekipo, cuida ekipo, respeta tur religion y tur hende. Johny tabata tin un lema cu ta bisa, respet ta base di tur amistad. Ami cu Johny Habibe nunca a discuti pero semper a rasona, pa asina positivismo por reina.
Johny Habibe a bira nos amigo di cas,director di Radio emisora Hit94 y mega 88, Johny Habibe a bay laga un legado atras cu mester continua cune.
Amigo Johny Habibe sosega na pas ( Juan 14:1-4),
Sinceramente, Pastor Marcel Balootje
