Diahuebs mainta Hues ta dicta sentencia den e caso penal cu Ministerio Publico a cuminsa contra Gregory Junior Zuleta Rave (22), kende ta wordo sospecha di a mata Corniel Tejada riba 3 Juli 2024, den un cas den Pindastraat.
CASTIGO DI 9 AÑA DI PRISON EXIGI
Dia 14 di Maart 2025, tratamento di e caso a tuma lugar. Durante tratamento di e caso, Zuleta Rave a para riba cu el a defende su mes contra e victima Corniel Tejada. Fiscal no ta haya cu Zuleta Rave a defende su mes sino cu a dal mata e victima Corniel Tejada. Fiscal a exigi 9 aña di prison pa Zuleta Rave.
Dialuna 31 Maart 2025 mainta Hues di Corte den Promer Instancia a sera tratamento di e caso penal contra Zuleta Rave (22) y a bisa cu dia 17 April 2025, e lo dicta sentencia.
Dia 1 April 2025 mainta, Hues a ordena pa laga Zuleta Rave liber. A haya confirmacion di esaki serca e abogado di Zuleta Rave, mr. Canwood. E abogado, durante tratamento di e caso dia 14 di Maart 2025 a bisa Hues cu Zuleta Rave a actua den defensa propio contra Corniel Tejada y ta haya cu mester declara Zuleta Rave liber.
Casi tur momento cu Hues duna orden pa laga un sospechoso liber, ta pasobra Hues tin un otro opinion cu Fiscal. Diahuebs mainta lo haya sa e decision di Hues.
