ORANJESTAD – Dialuna 13 Mei 2024, Hof di Corte Superior, ta cuminsa cu tratamento di e apelacion caso Avestruz.
SOLO DI PUEBLO por a compronde cu 7 sospechoso a apela e sentencia di aña pasa. Ta trata aki di Carlo R. Mansur, Curt D. Harms, Edgar R. Werleman, Ninosca D. Nuñez, Maria L. Arends, Pieter Susebeek y Benny Sevinger.
Ta asina cu durante dos siman caba, tabatin interogacionnan di testigonan a tuma lugar, preparando pa tratamento di e caso cu lo bay dura varios dia.
TESTIGONAN SCUCHA DEN CORTE
Ta asina cu durante algun siman, tabatin interogacionnan di testigonan a tuma lugar dilanti Hues Comisario pa prepara pa tratamento di e caso.
Dialuna 13 Mei 2024, ta cuminsa cu scuchamento di e testigo señora Dammers den e apelacion di Harms. Pa 2’or di merdia lo scucha e testigo homber Barquez den e apelacion di Sevinger y Susebeek.
Diamars pa 9’or di mainta lo scucha Benny Sevinger como testigo den e apelacion di Harms. Pa 2’or di merdia lo scucha Fowler den e apelacion di Sevinger y Susebeek.
7 DIA PA TRATAMENTO DI APELACION
Ta asina cu Hof a traha pa tratamento di e apelacionnan. Si conta e dianan di interogacion, en total ta 7 dia di tratamento di e apelacionnan.
E schedule ta cu lo cuminsa Diaranzon 15 Mei, sigui Diahuebs 16 Mei, Diabierna 17 Mei, Dialuna 20 Mei y Diamars 21 Mei. Despues di tratamento di e apelacionnan, Hof lo laga sa ki dia lo por spera sentencia.
