Ta cuminsa cu Santo Rosario pa 6.20 di mainta. Un biaha pa luna ta lanta trempan pa honra nos Mama Celestial. Pa resa pa esnan den mester. Ta un bon oportunidad diasabra awor pa resa pa bo defuntonan stima, cu ta haya oracion special y Santo Misa. Mama Maria ta interveni cu nos Tata den Cielo. Nos tin fe cu nos oracion humilde ta worde scucha. Un cantica cu nos ta canta ora di entiero cu ta: “Pa un debe, pa un debe nos mester di oracion”. Si nos tin mester di oracion tur dia. Manera ta un bon custumber ya pa 32 aña tur prome diasabra di luna tin Santa Misa na Alto Vista pa 7 or di mainta. Laga nos resa pa nos responsabilidad pa nos NATURALESA. Cuida nos Watapana y Cuihi, nos Cadushi, bushi y tunanan, tur tin nan balor den nos naturalesa. Mundo awe a bin hunto pa Cuida y Salba humanidad. Nos di Aruba tambe ta sinti e cayente di e atmosfera. Ta cu oracion so nos ta salba e mundo aki. E creacion tan perfecto aki ta obra mahestuoso di Dios. Ban trempan pa mira aurora, e nublina den seronan y salida di solo. Nos ta resa pa Pas den tur hogar, pa tur esnan den necesidad corporal y spiritual, pa nos enfermonan na cas, den hospital y esnan den exterior, pa nos grandinan den cas di cuido y na cas di nan keridonan pa no lubida pa esnan cu ta temporario a perde nan libertad. Cu poder di Dios nos ta sigi cu e bon costumber aki. Tur hende ta bon bini na e ora Sagrado aki cu ta un comienso di un dia bendiciona.
Comision di Alto Vista
Coordinador Sr. Mario Werleman 593 7048
Pastoor Huancho Pilongo 585 8378
Centro Pastoral Sta.Cruz
