Manera a indica algun siman atras, e accion den bario lo intencifica pa asina brinda e comunidad mas oportunidad pa deshaci di desperdicio mirando e temporada di fin di aña ta acerca.
Prome Minister Mike Eman durante conferencia di prensa diahuebs mainta a anuncia e proximo localidad pa Baki den Bario, cu e biaha aki lo bira Centro di Bario Playa Pabou.
Acompaña pa e departamentonan encarga cu e accion aki, a gradici na prome luga Dennis Burke cu ta presidente di Centro di Bario Playa Pabou, pa pone e area disponibel pa asina por cuminsa e preparacion pa e siguiente Baki den Bario.
E accion aki lo tuma luga diasabra awo, caminda ta manda un invitacion na henter e bario di Playa Pabou, Madiki, Bushiri, Rancho y vecindario pa nan forma parti di e accion di limpiesa aki, probecha di e bakinan cu lo ta disponibel pa asina benta mas sushi cu ta posibel afo.
Acompaña pa lider di fraccion di partido AVP Jennifer Arends-Reyes, Stephany Sevinger, Dennrich Kelly, John Hart, Otami Thomasia, Carlos Bermudez como miembronan di parlamento, consehero di gobierno Sonaly Fernandez-Acosta, consehero di asuntonan general Gerick Croes y demas departamento presente, Premier Eman a comparti informacion importante relaciona cu e accion den fin di siman.
A enfatisa e importancia di bario, cu ta forma un sociedad caminda ta lanta y crece den un cas, den un bario caminda ta forma amistad y oportunidad. Un bario ta caminda hopi a hunga y forma su mes cu locual e tabatin rond di dje den su bario. Lo determina hopi su personalidad. E bario ta crea e ciudadano di mañan.
Motibo grandi pakico ta haci e trabounan aki den bario, e hoben di awe ta bira e adulto di mañan cu a forma den e bario cu a crea pa nan. Cada bario tin su reto, pero tambe su fortalesa cual ta locual kier reenforsa y pone tur ingrediente pa e siguiente generacion por lanta cu sentido di compromiso cu bo bario, cu henter un pueblo.
Ademas di e mehoracion fisicio di cada bario, manera area recreacional, edificio, mantencion, infrastructura, iluminacion pero tambe atencion riba convivencia, comunidad pa asina tur hunto logra aporta na un Aruba limpi, un Aruba dushi, cu solidaridad y cu oportunidadnan nobo y mira hobennan crece cu speransa, adulto mayornan cu amor rond di nan y asina crea barionan dushi pa biba aden.
Gobierno, Prome Minister Eman t’ey tur siman pa mustra su compromiso pa mira e chispa den bario lanta bek, caminda bisiña ta cuida otro y ta apela di mira esaki den e ciudadano tambe.
Baki den Bario su accion ta cuminsa for di mainta tempran, pa 7:00am tin personal presente pa asina dirigi e ciudadano cu ta yega pa deshaci di su desperdicio. Probecha y yuda bo bario cu e accion di limpiesa aki. E siguiente Baki den Bario lo ta riba 29 di november na Paradera, 6 december na San Nicolas y 13 di december na Barcadera.
