Dicon pisca ta bira scars durante periodo di cuaresma
Durante cuaresma ta conoci cu pisca ta bira scars. Net den e tempo cu mas hende ta
activamente buscando pa come pisca fresco. Mastanto esnan cu ta sigui e tradicion
catolico unda cu ta come pisca diabierna. Esaki ta bira un punto di atencion. Pero
dicon pisca ta bira scars?
No ta unicamente e demanda ta subi manera ta implica aki riba. Berdad tin mas
demanda pa pisca durante cuaresma door di e.o. e tradicion cristian catolico cu ta
contribui cu mas hende ta busca pa come pisca den e temporada aki. Sinembargo esey
no ta e unico motibo.
Ademas di e aumento di demanda, varios otro factor ta contribui pa causa e scarsedad
percibi. E temporada ta coincidi cu biento duro. Biento di cuaresma ta bon conoci.
Pesey antes tempo cu ta subi flie, ta den cuaresma ta cuminsa, paso tin biento duro.
Biento hopi duro ta trece hopi biaha ola halto y lama malo cune tambe. Tur esakinan
ta dificulta e piscado local di trece pisca.
Hunto cu e factornan aki ta bin cune tambe cu e awa mes ta malo pa pisca. E ta un
periodo cu e awa ta birando berde, pero no e berde cu ta trece cuminda pa pisca y
pisca grandi su tras. Tin ora e ta trece olanan grandi di labadera of deiningen na
Hulandes cu ta haci dificil salida di boto y sa trece hasta kwal den awa. Tur esakinan
ta contribui cu ta mas dificil pa gara y asina tin menos pisca ta bin tera pa abastece
publico.
E periodo ta cay tambe den e “high season” di turismo cual tambe ta subi e demanda
pa pisca. Pensa riba e hotelnan y restaurantnan di cual tur ta ofrece pisca of “catch of
the day” of ta ofrece plato local cual ta encera pisca. Hopi biaha e consumo di turismo
of Horeca ta bay a costo di abastece e consumidor local cu ta sinti cu ta mas dificil
haya pisca.
Pa e piscado, esaki ta un periodo fastioso con cu bo kier mire. Un bon strategia cu nos
kier recomenda ta pa cumpra pisca henter aña largo cu mesun frecuencia. Si por, traha
lasonan cu piscado of bendedo di pisca. No keha mucho di prijs paso e piscado tin
gasto halto cune y e sa ki trabou e ta pasa pa garel’e. Dune su respet y balor y sigur no
antagonisa e humilde piscado. Di e forma ey, ta yuda e piscado stabilisa su ofishi y
tambe abo, como cliente, lo tin mas conocemento den e trabounan duro di piscamento
y asina abo como cliente ta haya mas chens di cumpra pisca fresco den e temporada di
cuaresma.
.
