Recientemente Digicel Business a publica su Informe y Guia di Transformacion Digital, teniendo cuenta cu e trayecto di transformacion digital y impacto di e pandemia riba mercado. E rapport a haci un encuesta bou di 1,900 negoshi den Caribe y mediante e investigacion, Digicel Business a haña un miho bista di na unda e companianan ta riba nan trayecto pa un transformacion digital y provee algun opcion tangibel den cual organisacionnan por inverti. Adishonal di duna un bista den Caribe, Digicel Business a realisa un rapport pa islanan ABC, Barbados, Bermuda, British Virgin Islands, Cayman Islands, Jamaica, Saint Lucia y Trinidad & Tobago.
Algo cu a bin dilanti den e rapport ta cu menos cu un tercera di empresanan encuesta (29%) a ‘upgrade’ nan siguridad cibernetico como resultado di e pandemia. Ta importante pa subraya cu e nivel y cifra di menasanan mundial pa loke ta atakenan cibernetico a aumenta grandemente desde comienso di COVID-19. E aumento aki por wordo atribui n’e echo cu hopi compania a haña nan mes obliga pa implementa e trahamento na cas den forma ‘remote’. Esaki den un intento pa proteha nan trahadonan di e impacto di e virus. Awendia, den e tercer aña di pandemia ainda tin hopi hende trahando na cas.
Mark Shoebridge, Director di Digicel Business a bisa: “Cyber Security ta un topico mundial y ta algo cu por tin un impacto devastador riba cualke hende, personalmente of profesionalmente, bo no mester ta un compania grandi pa bira su blanco. Mientras cu 77% di empresanan encuesta den henter Caribe a acelera nan strategia digital debi na e pandemia, e crecemento cu a bin despues como resultado di e inversion den e transformacion digital, ta na peliger si e siguridad cibernetico no keda actualisa respectivamente.”
Organisacionnan cu no a tuma e precausion necesario pa proteha nan informacion ta keda vulnerabel pa atakenan cu por ta catastrofico. Mundialmente, ta reconoce cu un atake cibernetico ta sosode cada 39 seconde. Ta nifica cu proteccion di data di tanto compania y cliente ta imperativo pa mantene cualke negoshi operacional dilanti menasanan cu semper ta presente.
Mark Shoebridge ta agrega: “Motibo cu nos a haci e investigacion aki ta cu nos a ripara cu tin falta di informacion den industria reflehando specificamente empresanan den Caribe. Nos ta spera cu e informacion den e rapport aki por sirbi como un guia pa cualke empresario cu ta contempla un transformacion digital y cu ta puntra nan mes con ta e miho manera pa haci esaki…”
E rapport ta specialmente pa empresarionan, lidernan den empresa y esunnan cu ta responsabel pa tomo di decision y cu kier mehora nan conocemento riba Transformacion Digital y su beneficionan, pero tambe desafionan den nos clima empresarial actual. E rapport ta obtenibel, pa download gratis riba e website di Digicel Business https://www.digicelbusiness.com/digital-transformation.html
