Gobierno di Aruba ta sigui boga pa un proceso di digitalisacion di servicio publico, cu e vision pa haci diferente tramite mas simpel, rapido, eficiente y transparente pa e ciudadano.
Den e proceso aki, tecnologia ta brinda oportunidadnan importante pa modernisa e manera cu servicio di Gobierno ta wordo ofreci. Door di pone mas proceso online, ciudadanonan por completa cierto tramite di un manera mas facil, sin necesidad pa bishita un departamento fisicamente pa cada cos.
Minister di Vivienda, Infrastructura, Servicio Interno y Telecomunicacion, Rene Herdé, ta enfatisa cu digitalisacion mester sirbi como un instrumento pa mehora e servicio y no pa reemplasa e atencion personal cu cierto ciudadano ainda mester.
Segun e minister, ta importante pa Gobierno reconoce cu no tur hende tin e mesun acceso, experiencia of facilidad pa traha cu computer y sistema digital. Entre cierto grupo di nos comunidad, tin personanan cu por haya dificultad pa haci tramitenan completamente online.
P’esey, e vision ta pa ofrece dos caminda pa acceso na servicio publico, un sistema digital online pa e ciudadano cu por y kier uza esey y un servicio personal pa esnan cu mester asistencia pa completa cualkier tramite.
“Nos kier haci cu hende por uza e sistema digital y probecha di e beneficionan di tecnologia, pero pa e personanan cu no por, tambe nos mester ta presente. Nos no por bisa cu tur hende mester haci tur cos online. Nos mester mantene e posibilidad di un servicio cara a cara, unda un persona por ricibi atencion y asistencia,” Minister Herdé ta enfatisa.
E enfoke ta parti di un vision di un Gobierno cu ta busca pa combina innovacion cu accesibilidad. Digitalisacion por aumenta eficiencia y transparencia, pero e meta final mester keda e mesun, pa brinda un servicio publico di calidad cu ta accesibel pa tur ciudadano.
Minister Herdé ta indica tambe cu e modernisacion mester bay hunto cu mehoracion di e procesonan interno. No ta suficiente pa simplemente pone un formulario online si e proceso tras di dje ainda ta bay poco poco of complica. E meta ta pa revisa e proceso completo, elimina obstaculo innecesario y haci cu e ciudadano por ricibi contesta y servicio mas eficiente.
Gobierno di Aruba ta reafirma su compromiso pa sigui inverti den tecnologia y digitalisacion, mientras ta garantisa cu ningun grupo den sociedad wordo laga atras.
