Dia pa dia e manera cu hende ta trata otro, e falta di respet, e desacuerdo, e division, e pleito y e rabia, ta pone nos pensa ta te na unda e asunto aki lo yega, acaso hende no ta pensa cu nan tin mester di otro como ser humano, acaso hende no ta stima otro mas como prohimo, pasobra ta dificil bisa cu bo ta stima Dios anto bo no ta stima bo ruman.( 1 Juan 4;19-22).
No ta algo pa haci wega cune, ni tampoco manipula, pasobra Dios no kier pa nos trata hende awe cu un cara awe ,y mayan cu otro cara, pasobra esey ta falsedad, y tur locual ta falsedad ta pica, pasobra un hende falso ta peca contra Dios y su prohimo, pesey nos mester tene bon cuenta con nos ta trata otro.
Si ta posibel asina leu cu ta depende di boso,sea na pasa cu tur hende.( Romanonan 12:18).
Nunca paga malo cu malo,na ningun hende.Respeta loke ta corecto den bista di tur hende.( Romanonan 12:17).
Falta di respet ta manera un manera di broma, por ehempel un hende ta sinta den un bus, y banda di dje tin otro persona sinta, e persona mester baha, pero e otro no kier, lanta of baha for di bus pa esun cu ta sinta banda di dje por baha, e ta mira cu e espacio ta chikito pero toch, e ta persisti di keda sinta, y laga e otro persona trompeca na momento di su bahada for di bus.
Un hende ta papia palabra sushi y no ta worry ken ta tende, sea ta hende grandi of ta mucha chikito.
A bira awor cu esnan cu ta usa droga, especialmente marihuana, no tin respet pa hende,nan ta usa publicamente:
Un auto ta pasa holor ta dal fuerte, manera ta algo obligatorio.
Humamento di droga riba caya manera ta sigaria,
Hende ta huma droga cu nan panja ta keda hole stinki di droga y asina mes nan ta cana drenta un tienda sin ningun clase di respet.
Y di berdad e cos ey ta kita pas di otro hende pasobra no ta tur hende kier pa droga wordo usa den nan presencia of presencia di nan yuinan.
1 Thesalonisensenan 5:13 ta para scirbi biba na pas cu otro.
Aspira pa tin pas cu tur hende, y santificacion, sin cual ningun hende lo no mira Senjor.( Hebreonan 12:14).
Pasobra e reino di Dios, no ta comemento y bebemento, sino husticia, pas y goso den Spirito Santo.
Pasobra esun cu di e manera aki ta sirbi Cristo , ta aceptabel pa Dios y aproba pa hende.Asina anto laga nos busca e cosnan cu ta trece pas y edificacion di otro. ( Romanonan 14:17-19).
Den nos hogar mester tin pas, na prome lugar pa nos oracion wordo scucha, pasobra hende cu ta rabia cu otro, no por uni den oracion.
Ora no tin pas, no tin cumunicacion sano y corecto, y asina nos relacion ta wordo debilita, y nos intimidad cu Dios y cu otro ta kibra.
Pesey e plabra di Dios ta bisa, no laga solo baha riba boso rabia,nu duna lugar na e diablo. ( Efesionan 4: 26-27).
Ta deber pa cada mayor lanta nan yuinan cu respet, door di demostra otro respet den cas, cual ta trece amor y harmonia, y esey ta base di tur union, pasobra eynan Dios lo comanda su bendicion ( Salmo 133).
Si bo enemigo tin hamber, dune pan pa come, y si e tin set dune awa pa bebe. Proverbionan 25:21).
Mantene pas cu otro.
Sinceramente, Pastor Marcel Balootje
