Ningun hende no mester ganja su mes y kere cu Dios lo bay di acuerdo cu maldad, pasobra maldad no ta bini di Dios, e no ta den e naturalesa di Dios, Dios ta berdad y berdad ta Dios.
For di principio di mundo, Dios a demostra esey y te e dia di awe, cos no a cambia, pasobra Dios no ta cambia.
Awendia nos ta mira mayornan ta tolera desobediencia di nan yuinan, amigonan ta tolera maldad, coleganan di trabao ta bay di acuerdo pa haci maldad, pero un spiertamento ta bini na nos mes, y ta corda tur hende cu Dios, no ta tolera desobediencia.
Adam e Eva a purba ganja Dios, y nan a wordo saca for di hardin di Eden y husticia di Dios a alcansa nan.
Moises siendo un lider di e pueblo di Dios, un homber cu Dios tabata papia cune, pa motibo di desobediencia, no a drenta e tera priminti.
Rey David siendo rey a kere cu e por haci locual cu e kier, pero Dios a demostra cu esey no ta posibel, pasobra Dios no ta tolera desobediencia, inhusticia y inmoralidad, y David y henter su Famia a sufri e consecuencia di locual cu e a haci.
Rey Saul tabata desobediente, y e a kere cu si e cana hunto cu e homber di Dios, cu yama Samuel cos lo drecha pe, pero esey no ta berdad, Dios no ta permiti hende sconde tras di su sirbidornan, Dios a expone tur cos y rechasa Saul.(1 Samuel 15:24-25-26-27-28-29).
Rey Nabucodonosor tambe a purba den su orguyo, y desobediencia di reta Dios, y Dios a pone na su lugar, y a demostra cu Dios no ta tolera orguyo, pero Dios ta stima humildad.
Ora un mayor ta mira su yiu ta haci robes, y e ta tolera e maldad , enbes di saca tur cos na cla, e ta haci su mes ciego, e ta duna su yiu forsa pa sigi den su bagamunderia, y e mes ta condena su yiu.
Sacerdote Eli tabata sa di e maldad di su yiunan, e a hala nan atencion, pero displina y coreccion no a tuma lugar, e no a kita nan for di caminda nan tabata haci maldad, y esey a causa cu Dios mes kier a mata nan, y nan tur dos a muri riba mesun dia, y Eli tambe ora e a ricibi mal noticia, riba mesun dia tambe a muri.( 1 Samuel 2:12-24) ( 1 Samuel 4:17-18).
Ora e pueblo di Dios ( Israel) ta den pica , Dios semper ta hala nan atencion, y pone su husticia riba nan , pasobra Dios no ta haci acepcion di persona, ora nan ta den pica , nan no por enfrenta e enemigo.( Josue 7:5-10-13).
Mescos cu henter un famia por bini dilanti di Dios pa haci un peticion pa un bendicion den tempo di necesidad of sanacion pa un ser keri, henter un famia por bini dilanti di Dios, y arepenti, pidi Dios pordon, confesa pica y drecha relacion cu Dios, y Dios lo scucha y pordona nan pica, y restaura e hogar completo.( 2 Cronicanan 7:14) ta e ehempel pa tur pueblo y pa tur hogar.
Nos ta bibando den tempo trabahoso, caminda maldad ta wordo scondi, inhusticia ta wordo practica, y inmoralidad ta wordo celebra.
Adulterio,fornicacion, a bira cos di celebra, ta parce manera hende ta lubida, cu Dios no ta di acuerdo cu e cosnan ey.
Laga nos recorda cu Dios ta Santo, e no ta tolera desobediencia, Dios ta hustu.
Sinceramente, Pastor Marcel Balootje
