Esaki ta e berdad cu nos tur por acepta cu caminda ciencia y psicologia cansa. Dios ta triunfa tur dia tur momento.Ora ciencia bisa cu no por, Dios ta bisa cu si por pasobra pa Dios nada ta imposibel.
Boca di hende ta bisa cu e hende aki no ta drecha , e hende aki no ta cambia, e lo keda mesun cos.
Palabra di Dios ta bisa cu cualkier persona cu bini na Cristo criatura nobo e ta, tur cos bieu a pasa y a wordo haci nobo.
Esey ta nifica cu no ta importa con un hende su situacion porta , con su mente por wordo afecta e palabra di Dios tin poder pa cambia su bida.
Un adicto por cambia, mescos cu Dios a cambia Saulo di Tarso, ora e palabra di Dios drenta den su bida y dune Dominio Propio, trece disiplina y responsabilidad bek den su bida.
Esey ta sosode ora e somete na liderasgo berdadero yen di amor, dedica cu un curason cu ta desea di mira cambio den nan prohimo, pasobra hende no por cambia hende, solamente Dios por cambia hende.
Mayoria hende cu ta usa droga kier ta liber, nan kier cuminda ora nan mester come, panja pa nan bisti, hopi di nan no ta banja pasobra nan no tin caminda decente pa banja. Ora nan logra hanja eseynan nan kier bay bek den nan caya y sigi usa droga, y sigi mantene bendedor di droga, cu e poco entrada cu nan tin.
Esey ta e cooperacion cu nan kier di tur hende,pero pa un hende berdadera mente cambia e mester di disiplina di e palabra di Dios, cual a keda proba cu e palabra di Dios ta cambia bida mas cu cualkier terapia humano.
Y Hesus a keda wak nan y bisa nan: Serca hende esaki ta imposibel, ma serca Dios tur cos ta posibel.( Mateo 19:26).
Si Hesus ta bisa asina, y hende ta bisa cu no por, esey ta nifica cu hende ta duda den e poder di Dios, y asina cu hende ta duda, of no kier aplica, reconoce of obedece e palabra di Dios, e resultado lo ta negativo, pasobra caminda tin duda of caminda hende ta kere cu nan ta mas sabi cu Dios, of hende ta mara na tradicion, nan lo no mira e Gloria di Dios.
Dios por cambia bida di hende completamente ( Genesis 41:14) te cu ( Genesis 41:40) for di prison pa gobernador of alto mandatario manera Dios a haci cu Hose.Pasobra Hose a drenta prison como un wardado di carne cu a wordo bendi, y un cria di cas cu nan a ganja riba dje, pero pa motibo di su dominio propio , den prison pa motibo di su fe, humildad, y confiansa den Dios e a ricibi revelacion y sabiduria di Dios.No tabatin universidad e tempo ey pa Hose bishita y bira accountant, pero Dios a dune tur cos.
Jeremias 32: 27 ta para scirbi: Mira Ami ta Senjor, e Dios di tur carni,acaso tin algo cu ta muchu dificil pa Mi?
Ademas lo Mi duna boso un curason nobo,y pone un spirito nobo den boso. Lo Mi kita e curason di piedra for di boso,y duna boso un curason di carni.( Ezekiel 36:26).
1 Juan 2:9 ta para scirbi: Esun cu bisa cu e ta den lus, y sinembargo ta odia su ruman ta den scuridad ainda.
Pa Dios nada ta imposibel, tur cos por cambia pa medio di Su palabra,E ta cambia bida y ta sana tur herida.
Dios ta libra nos di tur scuridad.
Sinceramente, Pastor Marcel Balootje
