No laga ningun hende bisa bo, cu no por, no laga nan horta bo sonjo, tampoco descurasha bo, pasobra si abo kere y confia den Dios, lo bo mira e gloria di Dios.
Aunke cuanto hende por ta contra, of ta kere cu bo mester ta miyonario pa bo logra, sabi cu si bo tin fe den Dios, bo sonjo lo bira realidad.
No ta importa si bo ta para bo so, basta bo ta para den Fe, tur hende por a core bay, y hasta tin biaha esnan cu bo a kere ta cu bo, no ta di acuerdo cu bo, si bo tin Fe den Dios, lo bo logra.
Tur cos ta depende si abo mantene bo fe den Dios y sigi perservera, pasobra Dios nunca ta bandona nos , aunke nos por ta infiel, Dios si ta keda fiel, Dios nos por nenga su mes.
Den boca di hende ta existi e palabra give up, pero den e vocabulario di Dios esey no ta existi, nos tin cu reconoce, cu nada no por stroba Dios di cumpli su proposito, ni falsedad di hende, ni bruheria, ni cuanto maldad wordo poni den bo caminda, si bo tin fe lo bo logra.
Aunke enemigo mes ta den e asunto y abo no sa, manera e historia di Job, na final lo bo sali vencedor, pasobra bo tin Fe y no a murmura, bo a kere y Dios, a haci.
No tin rivalidad pa Dios, no tin hende cu por stroba Dios, pesey no laga duda ni flohera, drenta den bo curason y causa cu bo ta trompica, pero tene fiel na Dios, y lo bo sali dilanti, lo bo ricibi locual bo a haci oracion pe.
Tur locual nos kier logra den bida, ta exigi curashi y perserverancia, nada no ta bini sin sacrificio, cosnan bon ta tuma nan tempo.
Hende grandi a yega di bisa: Sumpinja bo ta hanja tur caminda, pero fruta tin su temporada, pesey nos no mester di cansa di haci bon, pasobra den tempo di Dios , nos lo cosecha.
Palabra di Dios ta bisa: Deleita bo mes den Senjor y e lo duna bo e deseonan di bo curason. (Salmo 37:4).
Laga nos reconoce e bondad di Dios den nos bida segun Su palabra: Cu e duna bo segun e deseo di bo curason, y cumpli cu tur bo plannan. ( Salmo 20:4).
Serca hende esaki ta imposibel, ma serca Dios tur cos ta posibel.( Mateo 19:26).
Ta ken por a kere cu David lo vence Goliat?
Ta ken por a kere cu Sadrac . Mesac y Abednego por a wordo tira dn forno di candela y sali sin ningun cabey a kima?
Ta ken por a kere cu Anna un muher steril por a sali na estado?
Ta ken por a kere cu Spirito Santo lo baha riba Maria, y Maria a duna lus na e Salbador di henter mundo incluyendo su mes?
Ta ken por a kere cu Hesus lo lanta Lazaro for di morto, siendo cu Lazaro tabatin 4 dia morto, y tabata hole?
Ta ken por a kere cu Dios a lanta Cristo Hesus for di morto y awe E ta sinta na man drechi di Su Tata, y tur rudia mester dobla y tur lenga confesa cu Cristo Hesus ta Senjor pa gloria di Dios Tata.
Tin hopi plan den curason di hende,ma e conseho di Senjor esey lo permanece.( Proverbionan 19:21).
Sperando den Senjor, cosnan grandi ta wordo activa den nos bida, pasobra ta Senjor mes ta donjo di tur cos.
Sinceramente, Pastor Marcel Balootje
