Dios nunca ta laga nos bandona ni tampoco decepciona, pasobra e a priminti ti esey , y locual Dios priminti, Dios ta cumpli cune.
Mas nos hala na banda di Dios, mas nos lo compronde Su compromiso cu nos, awendia hopi hende no por para riba nan compromiso cu Dios, nan ta hiba un bida di promesa di boca, pero na final di dia no ta cump;i cu locual nan a promete na Dios.
Wak con facil,lihe,y sin pensa hende ta kibra nan promesa matrimonial.
For di ora un hende tin pensamento di infieldad, ya pica a drenta.
Ora un tata no ta cria su yiu, teniendo un bon trabao y un bon entrada, e a kibra cu su promesa paternal.
Cada biaha cu nos keda, sin cumpli cu mandato di Dios, nos ta fria y kibra relacion cu Dios poco, poco.
Ora nos yega dilanti di Dios, nos no por tira falta riba otro, manera mucha di scol,bisando cu ta pa falta di hende, pasobra ta asina Adam a kere , y a tira e falta riba Eva, pero e falta a cay riba su mes.
Ta tempo pa nos bira hopi serio, si hopi serio, pasobra e palabra di Dios ta bisa cu esun cu perservera te na final, esey lo drenta.
No cansa ni tampoco entrega, pasobra Dios semper ta na ora den nos bida,ora tur hende pensa cu nan no por mas, Dios ta presenta y haci cosnan grandi.
Nunca pensa cu bo a keda bo so, pero sigi haci esfuerso pasobra Dios lo yega na ora den bo bida , pa asina bo ricibi e bendicion cu E tin pa bo.
Senjor tin control riba nos bida, e enemigo ta haci tur manera pa haci cosnan mustra dificil, pero nos tin cu haci mas oracion , ora oposicion presenta, y nunca entrega, pasobra Dios nunca ta yega laat.
Preocupacion ta hiba na desesperacion, ta pone hende perde cabes pero nos tin di tene bon cuenta locual e palabra di Dios, ta bisa den Filipensenan 4:6; No preocupa pa nada, ma den tur cos,pa medio di oracion, y suplica cu gradicimento,laga boso peticionnan ta conoci dilanti di Dios.Y e pas di Dios, cu ta surpasa tur comprendemento, lo warda boso curason y boso mente den Cristo Hesus.
Preocupacion ta haci hende fisico y mentalmente malo. Y ta pone cu hende no por haci oracion, pasobra nan mente ta hopi carga cu circumstancia di bida, cu cos nan temporal, y asina nan fe ta debilita den cosnan di Dios.
Preocupacion ta yega serca tur hende , pero mescos cu e ta yega, Dios ta duna e formula pa sali for di dje, pesey Cristo Hesus a bisa den Mateo 11:28; Bin serca Mi tur cu ta cansa y carga y lo Mi duna boso sosiego.
Esey ta recomendacion di Dios, e no bisa cana plama bo asunto , tur rond sperando yudansa yudansa di hende, pero bini directamente serca Dios, pa asina Dios por atende bo asunto, pasobra Dios nunca lo yega laat.
Mas nos centralisa nos Fe den Dios Altisimo, mas ayudo nos por spera di parti di Dios, pasobra E ta Todopoderoso, Dios ta donjo di tur cos.
Actualmente nos ta mira mundialmente cuanto hende kier eherce poder riba otro, cuanto hende kier domina otro cu forsa diabolico, cuanto hende tin gera personal, politico, vengansa contra otro, y ta eherce dominio militar riba otro, pero den tur esaki Dios ta keda Dios y Dios semper lo yega na ora.
No keda sorpresa ora e man di Dios, sali na bo defensa, sea semper agradecido.
Sinceramente, Pastor Marcel Balootje.
