Den Genesis 6:22 Noe a demostra obediencia completo na Dios y a traha e Arca. .
Den Genesis 12:1-4 Abraham a demostra obediencia completo na Dios, y a bay caminda Dios a mande.
Den Genesis 26 Isaac a demostra obediencia completo na Dios y su cosecha tabata grandi.
Cristo Hesus a demostra obediencia completo,na Su Tata, pesey tambe Dios a hals’E te na halturanan y dun’E e nomber cu ta riba tur nomber.(Filipensenan 2:5-11).
Tur yiu mester ta obediente na nan mayor, esey ta mandato di Dios, pero di otro banda mayor tambe mester obedece Dios, pa asina nan obediencia ta completo y nan yuinan lo obedece nan.
Ora bo mes no ta obediente, ta dificil pa otro hende obedece bo, pasobra nan no ta mira obediencia den bo.
Ora nos ta obediente y ta somete na Dios, diabel ta huy for di nos, pasobra nos forsa pa reprende e enemigo ta sinta den nos obediencia.
Den 2 Corintionan 10:6 Pablo ta bisa: Y nos ta cla pa castiga tur desobediencia , una vez cu boso obediencia ta completo.
Den 1 Samuel 15 Rey Saul a demostra obedencia parcial, cual tambe ta cay bao di desobedencia.
Ora nos no ta den obediencia completo, forsanan di scuridad no ta respeta nos, pasobra nos autoridad no ta completo pa reprende nan. Mas fuerte nos obediencia na Dios ta, mas nos por resisti e enemigo..
Den Isaias 37 Rey Ezequias a demostra obediencia completo na Dios, y Dios a sali na su defensa.
Den Daniel Capitulo 6 Daniel a demostra obediencia completo na Dios y Dios a sera boca di leon.
Nos arma principal pa lucha contra forsanan di scuridad ta e Sanger di Cristo Hesus y nos obediencia na Dios.
Nos lucha no ta contra carni y sanger, pesey nos mester ta obediente na Senjor y a base di nos oracion na Dios, muraya lo basha abao y forti lo wordo tumba.
Ta den nos obediencia na Dios nos fe ta aumenta na e midi cu nos por expresa palabra nan cu ta reprende e enemigo den nomber di Cristo Hesus.
Tene cuenta cu desobediencia, of curason dobbel, of rebeldia no ta bin di Dios, y Dios nunca por usa un hende den estado di desobediencia, curason dobbel, caprichoso of rebelde y orguyoso pa Su honor y gloria.
Si nos ta duna bon ehempel na nos yuinan, nos mester cuminsa demostra na nos yuinan, e balor di tin un bon relacion cu Dios, pasobra ta di Dios, nos ta ricibi tur cos, nos bida mester ta un testimonio bibo na nos yuinan tocante di nos relacion cu Dios.
Y algo hopi importante cu nos mester sinja nos yiunan,ta pa nan pordona, pasobra hende obediente na Dios ta pordona, y pa haci esey pordon mester ta biba den nos como mayor.
Obediencia completo ta nifica dependencia completo riba Dios, manera Sadrac. Mesac y Abednego.
Obediencia completo ta manera Esther cu a enfrenta e rey.
Nos crecemento spiritual ta depende di nos obediencia, pasobra den esey Dios ta purba nos cu nos ta firme y fiel.
Un hende por ta masha studia, cu hopi placa, y cu hopi sabiduria, pero si e no ta obediente nan Dios, tur estudio y placa y sabiduria lo no por yude.
Nos obediencia ta demostra nos confiansa den Dios, caminda nos ta demostra cu no ta importa e situacion, pero nos ta sigi confia den Senjor.
Si un hende mester chercha bo pasobra bo ta obediente na Dios, cuminsa hari pasobra bo recompensa lo ta hopi grandi den cielo .
Sinceramente, Pastor Marcel Balootje
