Palabra di Dios ta adverti nos pa wak bon cu ken nos ta cana, y cu ken nos ta anda,bisando den Proverbionan 13:20: Esun cu ta anda cu hende sabi lo ta sabi,ma un companero di hende bobo lo sufri danjo.
Mescos e ta bolbe ripiti den 1 Corintionan 15:33 :
No laga ningun hende ganja boso, mal compania ta danja bon custumber.
Senjor su palabra ta bisa bon cla den Salmo 1;1
Bendiciona ta e hende cu no ta cana den conseho di malbadonan,
Ni ta para den caminda di pecadornan,
Ni ta sinta riba stoel di bofonadornan.
Tambe ora nos lesa nos bijbel bon y compronde , nos por a nota cu den Genesis 19 den e historia di Sodoma y Gomorra , E angelnan a bin busca Lot, Lot a esforsa su famia manera e angel a bise.
E yernonan a kere cu e tabata chansa pasobra nan tabata leu for di Dios, e casa no a tende di no wak patras y a bira un pilar di salo, e a wak patras pasobra su curason tabata pega na e cosnan cu e tabatin cu laga atras.
E angel a bolbe ripiti na Lot bisando pa e sali pasobra mientras cu Lot no sali nan no por destrui e lugar pasobra nan tabatin ordo di Dios pa saca Lot.
E dos yui muher a sali cu Lot pero riba nan tabatin spirito impuro cu tabata habita den Sodomo y Gomorra y tur hende sa kico Lot su dos yiu muher a haci cune( Genesis 19:33-38).
Un hende por ta un hende drechi , integro, decente, pero si e ta cana cu hende bandido, inmoral, nan ta strobe di cana drechi.
Hopi biaha nos ta kere cu nos por drecha hende, pero si e hende no ta somete su mes na Dios, no ta duna ningun clase di cooperacion pa su cambio, nada no ta pasa, e ta keda bay bek atras, pasobra e no tin dominio propio.
Tin algo masha cierto cu tur hende mester tene cuenta cune;
Cana cu hende robes, por pone bo persona cohe caminda robes,
perde trabao,
perde matrimonio,
perde famia,
cay sera.
cay den adiccion, y hopi biaha por causa bo un malesa cronico, of herida cu ta tarda pa cura, of hasta perde bo bida.
Palabra di Dios ta bisa lo siguiente; Dios ta lus y den dj’E no tin nada, nada di scuridad.
Si nos bisa nos tin comunion cun’E y sinembargo nos ta cana den scuridad, nos ta ganja y no ta practica e berdad.( 1 Juan 5-6).
Ora un hende ta cana cu Dios, bo ta nota esey na su karakter y na su actitud, tur ora humilde, y dispuesto pa yuda su prohimo, bo ta conoce na su frutanan, e no tin mester di bisa bo cu e ta cristian, bo ta reconoce den tur locual e ta haci pasobra e no por sconde esey.
Pasobra nos ta tempel di e Dios bibo, manera Dios a bisa: Lo Mi biba den nan y cana meymey di nan y lo Mi ta nan Dios, y nan lo ta Mi pueblo. Pesey sali for di meymey di nan y separa boso mes, Senjor ta bisa y no mishi cu loke ta impuro: Y lo mi ricibi boso.Y lo mi ta un Tata pa boso. Y boso lo ta yui homber y yiu muher pa Mi , e Senjor Topoderoso ta bisa.( 1 Corintionan 6:16-18).
Mayornan encurasha boso yuinan pa nan cana drechi, y wak bon cu ken nan ta cana.
Sinceramente, Pastor Marcel Balootje
