Ta un cara un hende por tin, un hende no por tin dos cara, pasobra na e momento ey ta disfrasando, y nos sa cu locual ta disfras no ta drenta dilanti di Dios.
Pasobra Dios kier nos biba cu e berdad , pasobra E ta e berdad,no ganja nos mes, pasobra tur locual un hende sembra lo e cosescha. ( Galationan 6:7-8).
Awor falsedad y dos cara ta trece decepcion, falta di confiansa, y esey ta peligroso.
Un mucha cu no ta confia no ta respeta, un hende grandi cu no ta confia ta biba riba un intrankilidad,
Un trahado cu no ta confia su donjo di trabao no por,no por ofrece su servicio manera debe ser.
Si dos hende casa no ta confia otro , pasobra tin falsedad y desconfiansa , con nan por lanta un famia, riba ken e yuinan lo tuma ehempel.
Falsedad y dos cara ta trece herida grandi den bida di hende , pero tene cuenta especial cu mucha , ora nan pone nan confiansa den nan mayornan, y mayornan trece falsedad den nan bida, e por causa un trauma.
Hopi biaha hende ta kere cu sutamento of maltrato di mucha ta haci hopi danjo, pero falsedad y dos cara por herida hopi profundo, y pone e mucha crece cu duda.
Esun cu ta cana haci redo ta saca secreto, pesey no asocia cu esun cu tin lenga los.
Hacimento di redo, ta un gran demonstracion di falsedad y dos cara, pasobra ora un hende confia bo cu algo ta abo e a confia, y e no a bisa bo bay hiba e noticia tur rond.
Hende cu dos cara ta wordo mira awendia mundialmente, si bo ta mira hendenan cu no ta respeta tregua, hendenan cu nan mes ta bisa cu tin pas, y despues nan mes ta bombardia, kier men cu bo no por acepta nan palabra como seriedad, pasobra nan a perde palabra, ora bo pensa cu nan ta bay stop, e ora ey nan a cuminsa pasobra caminda no tin palabra no tin confiansa.
Laga amor ta sin hipocrecia, Aborece loke ta malo,tene firme na locual cu ta bon, Stima otro cu amor fraternal, duna preferencia na otro den onor, no flakia den diligencia, ma sea ferviente den spirito , sirbiendo Senor.( Romanonan 12:9-11).
Palabra di Dios ta splika cla ora hende ta anda den falsedad y dos cara bisando: Pa esnan cu ta puro, tur cos ta puro, ma pa esnan cu ta contamina,y cu ta incredulo,nada no ta puro,ma tanto nan mente como nan consenshi,ta contamina.
Nan ta profesa cu nan conoce Dios,ma cu nan hechonan nan ta ninga Dios,pasobra nan ta abominabel, desobediente, y nan no ta sirbi pa nada bon.( Tito 1:15-16).
Hopi biaha nos ta mira hende cu ta papia di pas , pero maldad ta den nan curason.
Dios ta bisa nos pa no bay bek den pasado, Dios ta prohibi esey, pasobra locual a pasa no por haci nada den locual nos ta awor, por ehempel como mayor nos tin cu comprende cu si nos a
pordona nos yiu di curason, awel nos no por trece pasado bek riba dje.
Pasobra un mucha por bishita tur psycholoog, y tuma tur terapia, pero si no tin pordon di curason di su mayornan e mucha ey ta keda tranca, pasobra ora nos pordona un hende di curason, semper nos ta restablece confiansa bek, y nos tin porta habri pa duna un oportunidad nobo.
Falsedad y dos cara, ta enemigo di tur Famia, Matrimonio, nos yuinan mester wordo libra di esey,
Sinceramente, Pastor Marcel Balootje
