No tin nada mas tristo ora un hende ta ganja su mes, of e ta saca mentira riba otro hende , pasobra den tur momento Dios ta odia mentira.
Bijbel ta papia cu tin seis cos cu Senjor ta odia, si siete cos cu ta un abominacion p’E.( Proverbionan 6:16-19).
Wowo altanero.( Wowonan halsa cu ta mira otro cu menosprecio, cu hende ta sinti nan mes mas cu otro.).
Un lenga mentiroso.
Y mannan cu ta drama sanger inocente,
Piannan cu ta lihe pa corre haci maldad.
Un testigo falso cu ta papia mentira.
Y esnan cu ta sembra desunion den famia.
Algo tristo y notabel , cu tin hende no ta worry cu nan ta kibra un famia, basta nan logra locual cu nan kier.
Y hopi no sa esey , cu Dios ta contra esnan cu ta kibra un famia, bao di e pretexto cu ta e homber casa ey, nan gusta of ta e muher casa ey nan kier.Y tur hende sa e preis halto cu David a paga pa esey, con su propip famia a keda destrui.
No ta bon pa mete den matrimonio di otro hende, no ta bon pa laga diabel ganjabo cu bo tin cu destrui locual Dios a uni.
Tene cuenta cu Dios ta odia mentira, tene cuenta cu mentira ta bini for di diabel, ta e ta e tata di mentira, pasobra mentira ta den su naturalesa y cada biaha cu nos papia mentira, nos ta demostra dominio di diabel den nos bida.
Mundo a avansa den tur sorto di technologia, y asuntonan digital, pero te ainda hende no por compronde cu den mentira no tin ningun clase di crecemento.
Aunke un mentira por ta asina pura, toch e berdad lo alcanse, mentira nunca lo gana, pasobra Dios ta un Dios di berdad, y hopi biaha capricho ta pone hende permanece den scuridad.
Pretende algo cu no ta, aunke nos sa hopi bon cu Dios, no ta tuma parti den mentira, pasobra nos Dios ta santo, nos Dios ta lus, y den Senjor no tin nada, nada di scuridad.
Y esaki ta locual ta stroba nos crecemento, e mentira combina cu orguyo, pasobra mentira ta sali for di un boca orguyoso, cual kier pretende cu e ta mihor cu otro, y asina ta usa su lenga pa rebaha, of pa calumnia contra otro persona.
Orguyo ta un piedra di trompica den nos bida spiritual.
Mentira ta algo cu Dios ta odia, y e ta stroba nos relacion cu Dios, pasobra ningun mentira no ta drenta dilanti di Dios, tur locual nos ganja pa nos por ricibi, lo no ta di beneficio pa nos.
Awendia hende ta papia hopi di corupcion, cual tambe ta mentira, cu ta bini for di un mente orguyoso, cu no ta corda riba Dios, y kier locual e kier aunke mayan e mes ta yora, pasobra cu su lenga mentiroso e no a bay ningun stap pa dilanti.
Ta masha importante pa nos sinja nos yuinan pa no papia mentira, y nos mes cu ta mayor tambe mester duna un bon ehempel pa no inclui mentira den nos bida diario, pasobra un mentira por danja tur ambiente den un famia.
Si bo no por alcansa algo, bisa bo yuinan of bo esposa cu bo no por, no duna ningun promesa falso, pero papia berdad, cu abo como tata ta confia den Dios pa habri porta di bendicion, pasobra esey ta e boluntad di Dios pa nos bida.
Mentira ta destructivo, orguyo ta decepciona hende, aparta awe mes for di nan.
Sinceramente, Pastor Marcel Balootje
