Dios ta mira curason di hende, Dios conoce curason di tur hende, Dios conoce ken ta esnan cu ta di dje,serca Dios nada ta scondi, no tin asunto di bida priva, pasobra Dios sa tur cos, y nos tin di reconoce cu Dios ta Soberano.
Pesey considera boso yamada, rumannan cu no tabatin hopi hende sabi segun carni, no hopi hende poderoso, ni hopi hende nobel.
Ma Dios,a scohe e cosnan bobo di mundo pa brongosa e sabinan.
Y Dios a scohe e cosnan debil di mundo pa brongosa e cosnan cu ta fuerte, y e cosnan baho di mundo, y esnan desprecia, Dios a scohe e cosnan cu no ta nada, pa E haci e cosnan cu ta algo bira nada.
Pa ningun hende no gaba dilanti di Dios. Pasobra door di dj’E boso ta den Cristo Hesus.
Kende a bira pa nos sabiduria for di Dios y husticia y santificacion y redencion.
Pesey ta para scirbi: Laga esun cu ta gaba , gaba den Senjor. ( 1 Corintionan 1: 26-31).
Awor e mundo ta haci net contrali, nan ta pone hende segun nan escogencia, of preferencia, of esun cu ta cumbini nan, y no ta wak curason di hende, pasobra nan no ta capas pa wak curason, tampoco, solamente Dios por haci esaki.
Dios a cohe un wardado di carne, pa haci e un guerero riba un dia, sin ningun clase di experiencia militar, y despues haci e un rey riba un pais.esey ta locual Dios a haci cu David.
Dios a permiti un otro wardado di carne, wordo bendi door su propio rumannan, pa asina e resulta den un otro pais, pa ora su pais tin hamber, e tabata den puesto di gobernador, sin nunca studia nada, for di ningun hende. Dios a permiti pa e bay prison inhustamente, pa asina Dios por hacie sabi , cu sabiduria di Dios.Esey ta locual Dios a haci cu Hose.
Dio no ta wak titulo, ni tampoco famia, ni color, ni tampoco cabey, pasobra Dios a kibra tur protocol na momento cu E a usa Maria pa trece Cristo Hesus na mundo y Hose pa ta su tata di criansa, pasobra Maria a carga su propio Salbador den su barica y Hose a cria su propio Salbador cu tur hende tabata bisa cu Hesus ta yiu di e carpinte, pero Maria y Hose tabata sa e secreto.
Dios a usa Rahab un prostituta, pa yuda Su pueblo, Dios a usa Elias, Eliseo na un manera poderoso pa demostra Su poder.
Dios ta usa hende ordinario den un forma extraordinario.
Dios a saca Moises for di palacio, mande desierto y pa despues Dios a yama y usa Moises como e persona cu ta guia e pueblo di Israel for di Egipto.
Pesey nos obediencia na Dios, ta bal mas cu tur rikesa, tur placa cu tin den banco, tur propiedad cu por ta riba nos nomber, pa asina nos por ta disponibel pa wordo usa pa Dios.
Tin biaha hende ta pasa den situacion, cual nan ta bira esun cu ta wordo chercha,esun cu nan ta bisa cu no tin nada, of esun cu hende ta bisa cu e perde tur cos , pero Dios tin poder pa , lanta esnan cu ta na suela y pone nan sinta den posicion di gobernante, of usa nan pa Su honra Y Su Gloria.
Nunca bisa mi no por,of bisa Dios a lubida riba mi, sea semper humilde y disponibel, pasobra Dios su tempo no ta nos tempo, y Su tempo ta perfecto.
Sea disponibel semper pa Dios su yamada, y encargo.
Sinceramente, Pastor Marcel Balootje
