Pa nos tin un gobierno terenal nos ta bay urna y vota, y despues e gobierno elegi pa hende ta wordo forma y ta bay sinta den Bestuurskantoor, y goberna.
Palabra di Dios ta bisa lo siguiente den 1 Timoteo 2:1-2 :Pesey mi ta exhorta pa suplica, oracion,peticion,y gradicimento, wordo haci pa tur hende, pa reynan, y tur esnan cu ta den autoridad, pa nos por hiba un bida trankil y keto den santidad y dignidad. Esaki ta bon y aceptabel den bista di Dios nos salbador.
Y no ta importa cual partido ta sinta den gobierno, pasobra Dios no ta den asunto di politica partidista, Dios no ta simpatisa ningun hende mas cu otro, Dios no tin favorito, pero E ta manda haci oracion, pasobra Dios sa dicon e ta manda nos hacie.
Pero un cos nos tin di corda cu poder ta keda den man di Dios, y manera nos ta mira cosnan ta bayendo, ta tempo pa nos acudi serca Dios, pasobra e gobierno terenal no tin mas poder cu Dios, alcontrario tur gobernante mester di Dios den nan bida, nan cas y nan famia, mescos cu tur hende.
Den 2 Cronicanan 7 :14 Dios ta bisa: Si mi pueblo cu ta wordo yama na mi nomber, e no a bisa e gobernantenan cu ta wordo yama na su nomber, pasobra gobernantenan tambe ta wordo yama pa haci oracion como pueblo.
Y Dios a pone su condicion pa su pueblo:
Na prome lugar humiya nan mes y haci oracion,
Na di dos lugar busca Mi cara.
Na di tres lugar bira for di nan mal camindanan.
E ora ey lo Mi tende for di cielo y lo Mi pordona nan pica y sana nan tera.
E situacion actual cu nos ta bibando aden ta rekeri pa nos drenta den oracion urgente,y pidi intervencion di Dios.
Nos no por tapa solo cu un dede, e cantidad di arma riba caya ta alarmante y ta parce cu hopi arma ta den man di hubentud, of tin pasamento di arma un pa otro. Violencia hubenil, accidente, y morto den trafico ta alarmante.
Kico nos ta warda como pueblo pa drenta den un clamor, un oracion di intercesion, pa asina Dios manda su lus y kibra e scuridad di uso di arma , bruheria y idolatria riba nos isla, pasobra e ta alarmante.
No laga ningun hende of gobierno culpa otro, pasobra mientras cu tin discucion ken ta goberna mihor, maldad ta sigi crece, mal influencia ta sigi aumenta, pasobra nos adversario e diabel no tin cuenta cu politica ( Juan 10:10).( Efesionan 6:10-12).
Conta den e ultimo 10 anja cuanto hoben a mata otro cu arma di candela, nan no tin miedo di tira den area turistico, ni tampoco den bario, y drivebyshooting a bira pelicula.
Awor ki dia nos ta bini hunto dilanti di Dios, como hende cu ta kere cu Dios por yuda nos.
Ora danjo wordo haci na un Turista, y perhudica nos pilar Economico, pa motibo di hobennan cu ta cana cu curason yen di amargura.
Dios spaar nos y no laga cosnan sosode , manera a sosode den pasado y cu te awe hende no por lubida.
Pasobra nos tin cu reconoce cu Dios tin poder,y aumenta nos confiansa den Dios.
Si nos kier prevencion, nos mester bolbe bek serca Dios.(Job 22:21).
Dios bendiciona nos cuerponan di Seguridad y Salubridad , nan tur ta haci nan maximo esfuerso, pero nan no por mira tur caminda, pero e wowo di Dios si ta penetra tur caminda, y riba esey nos tin cu depende como pueblo.
Kico mas nos ta warda, riba ken?
Sinceramente, Pastor Marcel Balootje.
