Artikel ricibi di tercera; nomber y adres conoci pa redaccion.
Bosonan ta acepta e markamento di tatuahenan ariba boso curpa, pero boso mester compronde cu esey no ta bon den bista di Dios Tata. Semper nos mester mira, loke ta bon y loke ta malo y di loke Dios ta bisa den Bijbel. Boso mester samina y mira di unda e raisnan di markamento di tatuahenan ta bini. Mira loke Dios Tata ta bisa den Bijbel, Levitico 19: 28; “No haci cortanan ariba boso curpa pa e mortonan y no marka boso curpa cu tatuahenan.” Na esnan cu ta marka nan curpa cu tatuahe, nan ta comete un pika grandi y ofensivo.
Tatuahenan ariba curpa tin su raisnan den witchcraft y hopi hende ta hacie’le, pasobra nan tin influencianan maligno den nan bida y nan ta inconciente di esey. Tatuahenan satanico, diferente simbolonan y e promesanan haci pa medio di e tatuahenan, ta habri e caminda pa e mal spiritonan ta drenta den nan bida. Tin hendenan ta desfigura nan mes curpa, cubriendo nan curpa cu tatuahenan y nan aparencia ta mustra diabolico. Mira loke Dios Tata ta bisa den Bijbel, Deuteronomio 14: 1 – 2; “Jahwe, Dios di bosonan tin boso pa Su yiunan. No marka boso curpa y ni corta boso cabei pelon pa un morto. Pues bosonan ta un pueblo santo y consagra na Jahwe, boso Dios.” Tur e tatuahenan ariba curpa, ta ofendiendo e alma di e persona y tambe e ta ofendiendo e Spirito Santo cu ta den e persona y tambe e ta ofendiendo e Angel wardador di e persona.
Tin hendenan cu tin diferente tatuahenan ariba nan curpa, sea di flor, di caranan inocente of di un difunto, nombernan, imagennan y simbolonan diabolico etc., anto boso tin di compronde cu ta e promesanan haci na e tatuahenan aki, ta pone e mal influencianan ta drenta den e bida di e persona. Cristo-Hesus ta bisa den Bijbel, 1 Corinthionan 6: 19-20; “Boso no sabi cu boso curpa ta tempel di Spirito Santo? Dios a duna boso Spirito Santo y e Spirito Santo ta biba den boso. Boso no ta di boso mes. Dios a cumpra boso y e prijs ta paga! Usa boso curpa anto pa glorifica Dios.” Bosonan mester compronde bon, cu boso curpa y alma ta cumpra pa medio di e Sanger Precioso di Cristo Hesus na crus derama.
P’esey boso curpa y alma ta pertenece na Dios Tata y p’esey Dios Spirito Santo ta biba den boso curpa. Awor, nunca boso no a pensa, ta con boso por drenta den e Reino di Dios Tata un dia cu tur boso tatuahenan despues di morto?
Y mientras cu den Bijbel, Dios Tata ta prohibi nos pa no pone ningun tatuahenan
ariba curpa. Na tur esnan Cristian comberti cu a marka nan curpa den pasado inconcientemente pasobra nan no tabata sa, anto Cristo Hesus lo tin misericordia cu nan alma despues di morto. Pero na tur esnan cu a marka nan curpa cu tatuahenan concientemente y cu nan tabata sa cu no mag pone tatuahe, anto despues di nan morto nan alma lo wordo purifica den e candela di purgatorio, pa pago di tur nan errornan y di tur nan mal decisionnan, prome cu nan por drenta den e Reino di Dios Tata.
Un conseho hopi importante, na tur esnan cu tin tatuahenan diabolico, di dragon, di black panter, na esnan cu tin cortanan diabolico ariba nan curpa, esnan cu tin simbolonan satanico ariba curpa y na esnan cu tin e marka y e number di e diabel cu ta e 666 y e micro-chip ariba nan curpa. Tur e tatuahenan diaboliconan aki mester wordo kita for di curpa mas pronto posibel. Pasobra den Bijbel Cristo Hesus ta bisa bon cla na tur esnan cu tin tur e sorto di tatuahenan diaboliconan aki, cu nan lo no drenta den e Reino di Dios.
Lesa bon den Bijbel, Apocalipsis 14: 9-11; “E di tres Angel a pasa y a sclama na bos halto: “Ken cu adora e bestia y su imagen y laga pone e marka ariba su frenta of na su man, esun ey lo bebe di e binja di Dios Su rabia, cu ta prepara puro den copa di su ira y lo e keda tormenta cu candela y asufre dilanti di Angelnan, Santonan y di E Lamchi. Y huma di nan tormento ta subi bay halto den siglo di siglonan. Ni di dia ni anochi nan no tin sosiego, na tur esnan cu ta adora e bestia y su imagen y kende cu ta acepta e marka di su nomber.”
