Scuridad ta avansando, pero e lus di Cristo tey pa nos tur, maldad no tin respet, hopi hende no ta comprende locual Hesus Cristo a bisa den Juan 10:10 y tambe locual E ta bisa den Mateo 11;28.
Na unda mi por bay for di bo Spirito?
Of na unda mi por huy bay for di bo presencia? ( Salmo 139:7.
Ta pa hopi tempo caba cu e enemigo di nos alma ta hinca den ccabes di hende, mustrando cu no tin salida, keda den scuridad, pasobra no tin hende pa yuda bo.
Pero Cristo Hesus su brasa ta habri pa tur hende, no ta importa bo circunstancia, no ta importa ken bo ta, no ta importa kico bo por a haci, Senjor su palabra ta bisa cu si nos confesa nos pica E ta fiel y husto di pordona y libra nos di tur inhusticia.
Dios semper ta na tempo, ningun hende ta yega laat serca Senjor, Dios nunca ta ocupa,Su amor tey cada dia pa nos, pasobra Dios no kier pa ningun hende bay perdi ma pa tur yega na conocimento di e berdad.
E fiesta , e paranda, e uso di droga y alcohol,e canamento cu arma di candela, tur esey a bira cos normal den comunidad, mescos tambe rabia y vengansa a bira cuminda di tur dia, e inmoralidad a aumenta, e falta di respet pa mayor a bira manera algo di broma cune, y tur cos ta wordo haci manera ley no ta existi.
Hende no ta respeta bida di hende, hende no tin cuenta ki dolor otro hende tin basta nan haci locual nan tin cu haci, hende a perde consenshi, amor a disparce, hende no kier palabra di Dios, pasobra palabra di Dios, ta hala atencion di hende y ta recorda hende cu nos mester stima otro, pasobra esey ta un mandato di Dios.
Tin hopi hende ta sera nan curason pa Dios, nan no kier tende,nan ta sigi nan propio caminda, pero e amor di Dios nunca ta caba, y su misericordia no ta yega na un fin.
Dios conoce necesidad di tur hende, pesey E a duna Su Yiu unigenito, pa ken cu kere den dje no bay perdi ma tin bida eterna.
Pa medio di Cristo Hesus nos tur por hanja salbacion, pasobra ta Cristo Hesus a muri na crus pa nos tur sin excepcion di persona.
No ta importa bo bida, kico bo por a haci, of kico bo ta bay haci, Senjor conoce bo pa nomber, ningun hende por sconde for di bista di Dios.
Tur locual ta scondi lo sali na cla, pasobra e lus di Dios ta penetra tur caminda, y e lus di Dios ta e berdad di Dios.
Caminda e lus di Dios ta hende no por cana den mentira, hende cu ta cana den e lus di Dios, no ta cana cu arma pa mata otro hende, asina un hende ta cana cu arma, esey ta nifica cu e persona ey ta den un scuridad profundo, y cu e diabel ta goberna su bida.
Diabel no ta respeta, e kier destrui e ser humano, no ta importa ken bo ta , sea bo ta rico of pober, sabi of bobo, no ta importa bo color, una bes bo laga scuridad domina bo bida, esey ta nifica cu diabel tin bo mente controla.
Awe ta un dia mas pa arepenti y sali for di scuridad, corda bon cu no tin ningun clase di ganashi cu maldad.
Cristo Hesus ta para na bo porta, y ta bati, lage drenta.
Sinceramente, Pastor Marcel Balootje.
