E restauracion di mas grandi cu por tuma lugar den nos bida ta para scirbi den 2 Corintionan 5:17:
Pesey si un hende ta den Cristo , ta un criatura nobo e ta,e cosnan bieuw a pasa caba: ata tur cos a bira nobo.
Dios a reconcilia nos cu Su mes door di Cristo Hesus y asina restaura nos bida, sacando nos for di scuridad y trece nos na Su lus.
Antes nos tabata den scuridad, pero awor nos ta cana den e lus di Cristo, y dunando testimonio di un bida restaura.
Dios tin poder pa restaura tur cos den nos bida, pasobra nada ta imposibel pa Dios, e por restaura nos matrimonio, famia, yuinan. Trabao, negoshi, salud,finansas y tur locual nos mester cu ta den su boluntad.
Nos prome paso pa restauracion ta para scirbi den 1 Juan 1 :9 bisando: Si nos confesa nos picanan, E ta fiel y husto pa pordona nos, nos picanan y pa limpia nos di tur inhusticia.
Asina ta ora nos duna nos cooperacion, tur cos por wordo drecha, pero ora tin pica scondi den nos bida, cosnan cu nos ta pensa cu ta nos so sa, nos tin cu corda cu Dios sa tur cos y cu nada no ta scondi pa Dios, pesey nos tin di confesa na Dios, y asina kibra cu participacion di diabel den nos bida.
Dios su restauracion ta necesario, pasobra si nos no arepenti, y aparta for di maldad, nos no por alcansa locual cu Dios tin pa nos.
Hesus a bisa : Bin serca Mi tur cu ta cansa y carga y lo Mi duna boso sosiego, esey ta nifica cu E ta capas pa trata cu tur nos carganan, no ta importa con grandi nan ta, no ta importa con doloroso, ni cuanto tempo nos ta pasando aden, asina nos yega serca Hesus, nos por tin e seguridad di nos libertad.
Tin hopi hende ta cana carga, cu cosnan cu ningun momento nan no mester ta den, tin hopi a legalisa carga riba nan bida, pensando cu no tin salida, pasobra e enemigo a ganja nan, tin hopi cu a busca malesa pa nan curpa, pero cu tur e mal influencia di e enemigo, Dios ta keda poderoso, Dios ta keda misericordioso , yen di compasion pa esnan cu ta busca su ayudo.
Palabra di Dios ta bisa cla na nos: Y despues cu boso a sufri pa un toko tempo, e Dios di tur gracia.Kende a yama boso pa Su gloria,eterno den Cristo.E mes lo perfeciona,confirma,fortalese y establece boso. Na dj’E sea e gloria y e dominio pa semper y semper Amen.
Si Dios por a restaura cuidadnan grandi despues di gera especialmente despues di segunda gera mundial, bo no ta kere cu e por restaura bo bida.
Si bo auto por drecha, bo airco, bo sanacion por tuma lugar, dicon bo matrimonio no por wordo restaura, ni tampoco bo yiu no por wordo rescata for di droga?
Dios no por wordo limita den ningun situacion pasobra wak kico Dios a haci den bida di Job, pasobra awendia nos ta bisa un persona ta financieramente kibra, bankroet, y Job tabata pio cu esey pero den Job 42:10 ta para scirbi:
Y Senjor a restaura e rikesanan di Job,ora cu e haci oracion pa su amigonan. Senjor a duna Job dobbel di tur loke e tabatin prome.
Senjor a sana wowo di Bartimeo, y lanta Lazaro for di morto, tur cos ta posibel pa esun cu tin fe y ta kere, tur momento den e poder di Dios.
Sinceramente, Pastor Marcel Balootje
