1. Nos ta cuminsa menciona 4 asunto pa tur hende comprende kico ta pasando.
- Pa dialuna 24 november 2025 tin e RGA (Reunion General Anual) 2025 di CAPA convoca pa directiva di CAPA. Según e statutonan nobo di CAPA di 25 november 2024, no ta existi directiva mas. Ki mishi directiva convoca e RGA-2025.
- Ademas e convocación aki no ta di acuerdo cu articulo 21, lid 3 di statutonan . Si e reunión a ser convoca ariba dia 28 oktober 2025, e mester tuma lugar pa dia 12 november 2025 o después. Si dia 12 november 2025 no tin quorum, e reunión ta 14 dia después, esta dia 26 november 2025 o despues.
- Pa duna un cara legal di e reunionnan convoca dia 28 oktober 2025 a cambia e fecha di convocación di 28 oktober 2025 pa 20 oktober 2025, pa e RGA-2025. Pues a anti-dateer e fecha di un documento clave, esta a comete un falsificación di documento =“valsheid in geschrifte”. Cambia y pone un fecha prome cu esun oficial di un documento ta falsificación di documento. Aki ta trata di un convocacion di un RGA, esta un documeno oficial di nos cooperativa CAPA.
- Algun miembro di CAPA a ricibi otro convocación pa e RGA tuma lugar dia 15 november 2025 y si no tin quorum e reunion ta sigui dia 25 november 2025.
Tur ta indicación cu Directiva di CAPA ta den PANIC MODE cu violaciónnan grave di statutonan y di reglanan di comportacion, cual ta haci cu mester yama e RGA-2025 di nobo.
2. Pakico e Dirigentenan nobo eligi na april 2025, no ta dirigi CAPA ainda?
E pregunta grandi ta kico ta pasando cu e dirigentenan nobo cu a wordo eligi den e Reunion General na april ultimo. Di con nan no a wordo poni den funcion ainda? Kendenan ta tarda e proceso, directiva bieu di CAPA, Banco Central o tin otro motibo? Mester bini un claridad, ya cu 8 luna ta bay pasa.
E dirigentenan nobo tur ta cu bon estudio y preparacion pa dirigi CAPA, cual ta un indicación cu nan ta bay cumpli cu un tremendo trabao den nos cooperativa CAPA.
E actitud di e miembronan di directiva bieu, sigur di e tesorero M.B. ta indicación fuerte cu, nan ta den Panic Mode. Nan no sa kico pa haci pa alarga nan pertenencia den directiva of nan tin otro motibo?
A bay un petición por escrito di miembronan di CAPA na Directiva di CAPA pa cancela e RGA (Reunión General Anual) di 2025 poni ariba e fecha di 24 nov 2025.
Tambe pa e dirigentenan nobo, eligi casi 8 luna pasa, tuma over e dirigencia di CAPA.
Miembronan di e directiva bieu, por favor, hala un banda, boso a ser rechasa. Miembronan no kier bosonan mas. Democráticamente y concientemente, miembronan di CAPA a eligi dirigentenan nobo. Nan mester tuma over e dirigencia di CAPA.
3. Un investigacion Forensico di e BDO-NL, cu nan so por dicidi kende por ricibie.
E Investigación Forensico ariba e ladronicia di F 382.000,=, haci pa e companía Hulandes BDO, nos ta calcula cu e a ser compila correctamente. Maske ta directiva di CAPA a paga BDO y lo mester tin algo di bisa den e rapport final. Na Hulandes nan ta bisa: Wie betaalt, bepaaalt!! Loke ta hopi straño den e caso aki ta, cu Directiva ta scirbi, “cu Directiva no por duna e rapport aki, pasobra tin un NDA (Non Disclosure Agreement) cu ta bisa, cu solamente cu aprobación di BDO NL e documento ta wordo duna. Pues ta BDO NL ta dicidi kende por ricibi e rapport. Esey e grupo cu ta pidie no ta comprende”. E grupo aki ta comisión 11, miembronan di CAPA=doño di e placa, kendenan ta buscando e berdad con E LADRONICIA DI F 382.000,= a sosode, Comision 11 ta comprende tur cos. E NDA ta contra e filosofía di Cooperativismo, cual ta un asosacion habri y democrático pa tur miembro.
Ademas pa tur hende di bon boluntad, e custumber tur caminda di mundo ta, ora un rapport sali positivo pa bo of pa un grupo, nan mes ta tire ariba mesa y grita, “WAK E, NOS TA CLEAN”. Den e caso aki, NDA ta otro ehempel di PANIC MODE di directiva bieu.
Pakico tur e molestianan, estorbonan aki. Pakico den e ladronicia aki mester mata “transparencia”, no ta duna participación, no ta duna cuenta con tur cos a sosode.
E construcción di e NDA aki pa algún hende, e por ta normal pero sigur pa mayoría di hende, e.o. pa miembronan di Comision 11, e construcción aki ta contra e filosofía di Cooperativismo y ta indica un política pa e Berdad no sali na claridad.
Nos kier pa miembronan di CAPA y Pueblo, mes huzga kico ta pasando aki.
