Recien Corte di Husticia a dicta sentencia den e caso di empleado di Gobierno cu e director di Inmigracion, Andrew Hoo a cuminsa contra Minister di Husticia.
SOLO DI PUEBLO por a compronde cu Hues a suspende e decision di Minister di Husticia y a ordena pa Hoo reanuda trabao di biaha.
Andres Hoo a worde representa pa abogado mr. Steward, mientras cu Minister di Husticia a worde representa pa mr. Pieters.
SeΓ±or Hoo a cuminsa e caso contra e decision di Minister di dia 21 October 2025, caminda e Minister a ordena Hoo pa bay traha na un otro departamento, pasobra e Minister no tin confianza mas den Hoo.
Hues den su evaluacion di e caso ta mustra cu e Minister a tuma e decision aki, door cu e no a gusta e reaccion di Hoo ora el a ordena pa haya un lista di informacion di pasaheronan for di e systema Radex y tambe tur e cartanan caminda a nenga entrada di personanan y ordennan duna pa detencion y deportacion di hendenan. Hoo a manda carta pa e Minister informando cu mester ta mas specifico ki informacion kier pasobra e systema Radex di hopi informacionnan personal di hende. Tambe Hoo a bisa e Minister cu mester ta cuidadoso cu informacionnan persona di hendenan y pesey ta pidi Minister pa specifica cual informacion e kier y pakico. Hoo a bisa e Minister cu mester respeta e privacidad di cada pasahero.
MINISTER A TUMA MEDIDA CONTRA HOO
Ta asina cu e Minister a reacciona riba Hoo cu e no tin confianza mas den Hoo y cu e ta manda Hoo bay traha na Cuerpo Policial encarga cu e maneho nobo di rijbewijs. E Minister a cuestiona e forma con Hoo lo a expresa di e Minister den un combersacion riba whatsapp cu coleganan. Ademas e Minister ta haya cu Hoo no ta respeta su orden y ta pone condicionnan siendo cu como Minister e ta autoriza pa haya e informacionnan aki.
E Minister tambe a cuestiona cu Hoo y e Minister anterior a firma cartanan di dispensacion siendo cu nan no ta autoriza pa esaki.
Minister a dicidi cu pa un periodo di 6 luna, Hoo lo mester bay traha na un otro departamento cu ta encarga cu e independizacion di e departamento encarga cu rijbewijs.
EVALUACION DI HUES
Ta asina cu Hoo ta haya cu e decision di Minister ta contra ley ya cu mester a usa e principio di interogacion promer cu yega na un decision asina cu e ta haya ta inhusto.
Hues ta mustra cu Minister mester ta cuidadoso den decisionnan cu e ta tuma. Ariba e asunto di cu Minister no tin confianza mas riba Hoo, Hues a bisa cu durante tratamento di e caso a sali na cla cu dos biaha Hoo a bay reuni cu Minister riba peticion di Minister. Ningun rato Hoo a wordo avisa riba kico lo bay papia. Hoo a wordo sorprendi cu e asuntonan cu Minister a papia cunβe y e no tabata prepara pβe.
Pa loke ta e ponencia di Minister cu Hoo lo a falta respet den su carta, Hues no ta comparti e punto di bista aki. Hues ta haya cu Hoo ningun momento a mina e maneho di Minister.
HUES A ORDENA PA HOO BAY TRAHA
Hues a sigui cuestiona mas di e opinionnan di Minister y a conclui cu no tin motibo pa Minister tin desconfianza den Hoo. Hues ta haya e decision di Minister no responsabel.
Hues su decision ta cu e ta suspende e carta di Minister y ta ordena cu entrante 15 December 2025, Hoo ta reanuda su funcion como director di Inmigracion.
