Den pasado Roland Tuitt di Lotto a bisa den prensa cu e acuerdo di cooperacion entre Fundacion Lotto pa Deporte, Stichting Sportsubsidie Aruba y Gobierno di Aruba di 2017 unda ta stipula cu Lotto pa Deporte ta duna entrante 1 januari 2017 un suma di Afl. 4 miyon y entrante 1 januari 2018 un suma di Afl. 4,5 miyon pa cu subsidio di deporte ta un Letter of Intent.


Esey no ta berdad, pasobra den e raport 2019 di Lotto pa Deporte mes controla door di Accountant ta para riba pagina 32 bon cla cu e subsidio ta Afl. 4,5 miyon y no Afl. 4 miyon entrante 2018. Loke ta pasa cu Lotto pa Deporte no kier cumpli awor aki cu e contracto di subsidio di 2017 cu a wordo prepara y firma entre otro door di ex Ministro di Deporte Schwengle cu ayudo di Roland Tuitt mes como consehero di dicho ex Ministro.


Ningun momento Gobierno a cambia su maneho. E situacion actual di Lotto pa Deporte ta financieramente dieptriest y esaki ta bay bek principalmente na e deal cu Canadian Bank Note (CBN) na 2011 ora Lotto pa Deporte tabata na rand di bancarota causa mal maneho y mal gastamento di placa den aña 2010 y 2011, principalmente na gastonan di investigacion. E deal sera na 2011 cu CBN ningun momento tawata un win-win deal pa FLPD. Esaki a wordo confirma tambe den raportnan di diferente expertonan.


Ora a negocia e deal na 2011 ningun momento e bestuur di Lotto a zorg pa den e modelo di maneho door di CBN lo tawata tin placa disponibel pa paga bek na Gobierno di Aruba e fiansa di Afl. 17 miyon. E bestuur di Lotto tabata bon na altura di e contracto di fiansa cu Gobierno di Aruba di e Afl. 17 miyon cu mester cuminsa wordo paga bek na Juli 2020. 


Den e contracto di fiansa cu Gobierno di Aruba a duna na Lotto un periodo di gracia di 10 aña. Awor Lotto pa Deporte mester cuminsa paga bek y no kier cumpli. E ta usa como excusa foho cu Gobierno di Aruba a cambia su maneho. Lotto pa Deporte a para bira bao maneho di Roland Tuitt un partner NO confiabel den cumpli cu contractonan firma.


Hasta a bay asina leu di kita e placa di pago di fiansa for di e subsidio di deporte destina pa Stichting Sportsubsidie Aruba. E maneho robes aki ta perhudicando deporte malamente manera recientemente a wordo confirma publicamente door di representante di Stichting Sportsubsidie Aruba y tambe door di e representante di Comite Olimpico Aruba (COA). 


Ta bini aserca cu Lotto pa Deporte no ta cumpliendo tampoco cu tur e condicionnan den e contracto di fiansa cu Gobierno di Aruba. Den e contracto ta legalmente stipula cu Gobierno di Aruba por pidi Lotto pa Deporte full e placa di e fiansa cu ta outstanding ainda. Mirando e situacion financierno di Lotto pa Deporte ta obvio cu Lotto NO por paga full e suma aki y por wordo declara bancarota den corte.


Tampoco den e contracto di maneho cu CBN den 2011 ningun momento Lotto a zorg pa tin placa pa paga Fundacion Facilidadnan Deportivo den mantencion di e complehonan deportivo unda e donjo legal ta Lotto mes. Na 2011 e unico placa cu Lotto a negocia cu CBN ta e Afl. 3,5 miyon pa cu Sportsubsidie Commissie, cual placa ta destina pa e federacionnan.

Esaki ta regla den e acuerdo di cooperacion di 2012 entre Lotto y Sportsubsidie cu a caduca ora a firma e acuerdo di cooperacion cu Stichting Sportsubsidie Aruba. Legalmente Sportsubsidie Commissie NO ta existi mas. Ta Roland Tuitt so den su manipulacion di informacion varios biaha ta referi na e Commissie aki, hasta mentirosamente den e rapport di Lotto 2019 sinembargo e raport mes ta papia di Afl. 4,5 miyon.

LEAVE A REPLY

Please enter your comment!
Please enter your name here