Hopi hende por tin varios opinion, pero si bo no ta un deportista, of un dirigente di deporte, bo opinion no ta alcaso, pasobra bo no ta biba e decadencia di deporte, e lucha y sacrificio cu mester haci, pa saca e deporte padilanti.
No solamente bou di maneho di Roland Tuitt, e fundacion Lotto pa Deporte debe miyones na Stichting Sportsubsidie Aruba, pero tambe tin un debe grandi na Fundacion Facilidadnan Deportivo.
E jaarrekening 2019 di Lotto pa Deporte traha door di Roland Tuitt y audita door di oficina di acountant Grant Thornton ta mustra riba pagina 26 un debe di casi Afl. 600.000 na Fundacion Facilidadnan Deportivo.
Ta pesey mes no por tin placa pa mantene e facilidadnan deportivonan cu Lotto pa Deporte mes ta doño huridico di nan. Esaki si ta algo insolito y sigur por papia di un berguensa nacional.
Ta mas cu obvio cu mundo di Deporte ta grita auxilio pa un cambio radical den Fundacion Lotto pa Deporte. E debe ta para clarito riba pagina 26 den secion ’10 Current Liabilities’, esta na final di december 2019, Fundacion Lotto pa Deporte debe Fundacion Facilidadnan Deportivo e siguiente sumanan:
Payable Stichting FFD Afl. 257.934
Payable Stichting FFD -Funding projects Afl. 341.819
Total Afl. 599.753
Bou maneho di Tuitt ta bisto cu Lotto pa Deporte a bira un malpagado y un sinberguensa.
Aya banda a bin compronde tambe cu Lotto pa Deporte tampoco no ta pagando nada, ningun vergoeding, na Fundacion Facilidadnan Deportivo pa e mantencion di e varios complexo deportivonan cu ta pertenece legalmente na Lotto pa Deporte.
No por ta asina cu e weganan di loteria y catochi, cu ta varios, ta genera miyones y miyones di placa y tog ta cu placa di belasting (pueblo), subsidio di gobierno, mester mantene e facilidadnan aki.
Ta ora pa CBN compronde cu mundo di Deporte na Aruba ta exigi su ‘fair share‘ di weganan di loteria y catochi.
E maneho aki di Sr. Tuitt si, ta un disaster pa Deporte y pa nos atletanan di Aruba.
Y tog e tawata tin e curashi di papia soketada den prensa cu financieramente Lotto pa Deporte ta bon para cu tur e Mega Debenan!
Ta intresante pa mira ta KEN of KENDENAN lo kier defende e rotsooi aki, pasobra obviamente esun cu defende, ta CONTRA DEPORTE y DEPORTISTANAN!
